რა პრობლემაა არასამთავრობო ორგანიზაციისთვის, წარმოადგინოს მიღებული დაფინანსების მიმართულებები? – ამაზე ვერაფერს აცხადებენ. დაუჩემებიათ კანონპროექტი რუსულია და დამთავრდა! ეს ბადებს ძალიან სერიოზულ ეჭვს იმასთან დაკავშირებით, რომ ესენი რასაც რუსულს ეძახიან, ეს არის რუსეთის მიმართ ეკონომიკური სანქციების არ დაწესება, – ამის შესახებ პარლამენტის პირველმა ვიცე-სპიკერმა, გიორგი ვოლსკიმ „დღის ქრონიკაში“ ჩართვისას განაცხადა.
მისი თქმით, მათ მიერ მომზადებული გამჭვირვალობის შესახებ კანონი არ განსაზღვრავს კონკრეტულად, თუ რომელი ქვეყნებიდან შემოსული დაფინანსება წარმოადგენს საქართველოსთვის საფრთხის შემცველს.
„ფაქტობრივად, ჩვენ შიდა პოლიტიკურ ველზე გვყავს პოლიტიკოსები და მათთან პირდაპირ გადაბმული არასამთავრობო ორგანიზაციები, რომლებიც მთელს საქართველოს საზოგადოებას უცხადებენ, გვაქვს გარკვეული თანხები, რომელიც უნდა გამოვიყენოთ და რისთვის უნდა გამოვიყენოთ, თქვენ ამას არ გეტყვით. ჩვენ ძალიან ცუდი მაგალითები გვაქვს, თუნდაც იმ არასამთავრობო ორგანიზაციების მონაწილეობა მიტინგებში, სადაც მთავრობის გადადგომას, ფიზიკურ დაპირისპირებას მოითხოვდნენ და სადაც უკრაინაში დაწყებული ომი შესაძლებლობის ფანჯრად იყო განხილული“, – აღნიშნა ვოლსკიმ.