“ჰამასი“ აცხადებს, რომ ცეცხლის შეწყვეტისა და მძევლების გათავისუფლების შესახებ ისრაელის ბოლო წინადადება არ აკმაყოფილებს მათ მოთხოვნებს

„ჰამასი“ აცხადებს, რომ ცეცხლის შეწყვეტისა და ისრაელელი მძევლების გათავისუფლების შესახებ ისრაელის ბოლო წინადადება არ აკმაყოფილებს მათ მოთხოვნებს.

„ჰამასის“ მიერ გავრცელებულ განცხადებაში აღნიშნულია, რომ წინადადება ეგვიპტის, კატარისა და აშშ-ის შუამავლების მეშვეობით მიიღო.

„მიუხედავად იმისა, რომ ვაფასებთ ძალისხმევას, ისრაელი ჯიუტია და არ უპასუხა ჩვენი ხალხის არცერთ მოთხოვნას”, – ნათქვამია განცხადებაში.

ამასთან, „ჰამასის“ თქმით, ლიდერები განიხილავენ წინადადებას და აცნობებენ შუამავლებს თავიანთ პასუხს.

„ჰამასი“ მიისწრაფვის, მიაღწიოს შეთანხმებას, რომელიც ბოლოს მოუღებს ჩვენი ხალხის წინააღმდეგ აგრესიას“, – აღნიშნულია განცხადებაში.

აშშ-ს ცენტრალური სადაზვერვო სააგენტოს დირექტორმა, ბილ ბერნსმა წარადგინა ახალი წინადადება ცეცხლის შეწყვეტისა და „ჰამასის“ მიერ ისრაელელი მძევლების გათავისუფლების შესახებ. სამეტაპიანი შეთანხმების პირველი ეტაპი ითვალისწინებს პალესტინელი ტყვეებისა და პატიმრების გათავისუფლებას 40 ისრაელელი მძევლის სანაცვლოდ.