ჩვენ 9 აპრილის და იმ ბრძოლის დაწყებიდან 35 წლისთავზე მივდივართ ევროკავშირისკენ და დღეს უკვე ისტორიული რამ ხდება, საქართველოს ევროკავშირის კანდიდატის სტატუსი აქვს, რაც ნამდვილად დიდი მონაპოვარია, – ამის შესახებ ევროინტეგრაციის კომიტეტის თავმჯდომარემ მაკა ბოჭორიშვილმა „დღის ქრონიკაში“ განაცხადა.
მისივე თქმით, ოპოზიცია სხვა ვერაფერზე აშენებს პოლიტიკურ დღის წესრიგს და ცდილობს, საგარეო საკითხები, ქვეყნის ევროკავშირში ინტეგრაცია, საკითხი, რომელიც საქართველოს მოსახლეობისთვის ერთ-ერთი უმნიშვნელოვანესია, გამოიყენოს იმისთვის, რომ ქართველი ხალხი აშანტაჟოს, რათა რამენაირად პოლიტიკური ქულები დაიწეროს.
„ოპოზიცია არ უშვებს არანაირ შანსს ხელიდან, იგონებს კიდეც მიზეზებს, რომ რამენაირად ხელი შეუშალოს საქართველოს ევროკავშირში ინტეგრაციას. მერე ამბობენ, რომ ისინი არიან ყველაზე მეტი ქომაგები საქართველოს ევროინტეგრაციის. ამაზე მე პირადად კითხვები არ მაქვს. დიდი ხანია ვაკვირდები მათ ქმედებებს და ახლა უკვე ძალიან ახლოდან ვხედავ, საქართველოს პარლამენტშიც ოპოზიციის მხარეს არიან ადამიანები, რომლებიც კანდიდატის სტატუსის მინიჭებაშიც ხედავდნენ საფრთხეს. ამ ადამიანებზე ვსაუბრობთ ახლა, რომ ესენი აშინებენ და აშანტაჟებენ მოსახლეობას, ქართველ ხალხს, რომელსაც სურს ევროკავშირის წევრობა, რომ კანონმა, რომელიც შეეხება დემოკრატიის განმტკიცებას, გამჭვირვალობა არანაირად არ შეიძლება იყოს დემოკრატიის წინააღმდეგ, შეიძლება ხელი შეუშალოს ევროკავშირისკენ სვლას. ჩვენ 9 აპრილის და იმ ბრძოლის დაწყებიდან 35 წლისთავზე მივდივართ ევროკავშირისკენ და დღეს უკვე ისტორიული რამ ხდება, საქართველოს ევროკავშირის კანდიდატის სტატუსი აქვს, რაც ნამდვილად დიდი მონაპოვარია. ევროკავშირის წევრობამდე რომ დიდი გზაა გასავლელი, ესეც ხომ ყველამ კარგად ვიცით?! ამისთვის ხომ ყველა მხარე უნდა მოემზადოს – ევროკავშირიც და საქართველოც, ესეც ხომ კარგად ვიცით. ამ პროცესში სპეკულაციები რამდენად ხელის შემწყობია, ეს თავად მოსახლეობამ გადაწყვიტოს. ეს არის ხელის შემშლელი ინსტრუმენტი. ოპოზიცია სხვა ვერაფერზე აშენებს პოლიტიკურ დღის წესრიგს და ერთადერთი რამ რჩება, რომ საგარეო საკითხები, ქვეყნის ევროკავშირში ინტეგრაცია, საკითხი, რომელიც საქართველოს მოსახლეობისთვის ერთ-ერთი უმნიშვნელოვანესია, გამოიყენოს იმისთვის, რომ ქართველი ხალხი აშანტაჟოს, რათა რამენაირად პოლიტიკური ქულები დაიწეროს. რასაც ვხედავთ, ასეთი მიდგომებით ისინი ვერანაირ პოლიტიკურ ქულებს ვერ იწერენ“, – აღნიშნა მაკა ბოჭორიშვილმა.