ნათელია, რომ „ქართულ ოცნებას“ არ აქვს იმის პრობლემა, რომ 26 ოქტომბერს არჩევნები დამაჯერებლად მოიგოს და მიიღოს საქართველოს მოსახლეობისგან მანდატი, იმისთვის, რომ ქვეყანამ ეკონომიკური წინსვლა და ზრდა გააგრძელოს, – ამის შესახებ თავდაცვის მინისტრმა, ირაკლი ჩიქოვანმა გადაცემაში „იმედი LIVE“ განაცხადა.
მისი თქმით, რადიკალური ძალები ყველაფერს აკეთებენ ამ ყველაფრის საწინააღმდეგოდ, მათ შორის, ამ კონტექსტში მინისტრმა ისაუბრა ტერაქტისა და სახელმწიფოს წინააღმდეგ შეთქმულების საქმეზე.
„დანაშაულის ეს მცდელობა მიმართულია იმისკენ, რომ მაქსიმალურად მოხდეს იმის უარყოფა, რაც დღეს ჩვენს საზოგადოებაში არსებობს. ანუ, არ მისცენ საშუალება ჩვენს საზოგადოებას, რომ თავისუფლად გააკეთონ არჩევანი. ამ პირებმა, რომლებიც იყვნენ უკვე ხელისუფლებაში, არაერთხელ დაანახეს, რომ ძალადობრივად ეპყრობიან საქართველოს მოქალაქეებს და მათ ესმით მხოლოდ ძალადობის ენა და ახლა ოპოზიციის მხრიდან ცდილობენ იგივე მეთოდები გამოიყენონ. ეს არის უმძიმესი დანაშაულის შესაძლო ფაქტი. მეორე მხრივ, საზოგადოებაში დღეს ნათელია, რომ „ქართულ ოცნებას“ არ აქვს იმის პრობლემა, რომ 26 ოქტომბერს არჩევნები დამაჯერებლად მოიგოს და მიიღოს საქართველოს მოსახლეობისგან მანდატი, იმისთვის, რომ ქვეყანამ ეკონომიკური წინსვლა და ზრდა გააგრძელოს, რომელიც ბოლო ათწლეულია ჩვენ ქვეყანას აქვს. ამის საწინააღმდეგოდ არის ეს ყველაფერი მიმართული“, – აღნიშნა ჩიქოვანმა.