თანამშრომლობა, რომელიც გვაქვს თავდაცვის სამინისტროს პენტაგონთან აქტიურად გრძელდება,-ამის შესახებ თავდაცვის მინისტრმა ირაკლი ჩიქოვანმა გადაცემა „იმედი LIVE“-ში ისაუბრა.
ირაკლი ჩიქოვანმა „გამჭვირვალობის შესახებ კანონთან“ დაკავშირებით ზოგიერთი დასავლელი პარტნიორის დამოკიდებულებასა და წვრთნების გადატანასთან დაკავშირებით დასმულ შეკითხვას უპასუხა. მისი თქმით ყოფილა შემთხვევა, როდესაც საქართველოს ხელისუფლების კონკრეტულ გადაწყვეტილებებთან დაკავშირებით ყოფილა მწვავე რეაქციები, თუმცა მას შედეგი არ მოჰყოლია.
„პოლიტიკურ რეალობაში ვიტყვი ერთ რამეს, რომ ჩვენ გვქონია ძალიან ბევრჯერ საკუთარი მკაფიო და პრინციპული პოზიცია, რომელსაც შეეწინააღმდეგნენ დასავლელი პოლიტიკოსები. მაგრამ ყველამ დავინახეთ, რომ ეს საბოლოო ჯამში იყო სწორი პოზიცია რომელიც ჰქონდა „ქართულ ოცნებას“ და ხელისუფლებას და ეს პოზიცია ეფუძნებოდა საქართველოს მოქალაქეების საუკეთესო ინტერესს. ამის მაგალითები თუნდა ბოლო რამდენიმე წელიწადში ძალიან ბევრი შეიძლება მოვიყვანოთ.თუნდაც ის საკითხები რომელიც უკავშირდებოდა უკრაინაში ომის მიმდინარეობას. იცით, რომ გვქონდა არაერთი მოწოდება იმასთან დაკავშირებით, რომ სანქციები დაწესებულიყო, მოწოდება იმასთან მიმართებაში, რომ ჩვენ, ხელისუფლების თანხმობით მოხალისეები გაგვეგზავნა უკრაინაში და ბევრი სხვა საკითხები. საკმაოდ მწვავე რეაქციები იყო სიტყვიერი და ამ რეაქციებს არ ჰქონია შედეგი.
რაც შეეხება საკითხს, რომელიც უკავშირდება „გამჭვირვალობის შესახებ კანონს“, ყველა კარგად დაინახავს, რომ ეს არის კანონი რომელიც ეფუძნება ერთ-ერთ მთავარ დემოკრატიულ პრინციპს, რომელიც არის გამჭვირვალობა. და ასევე ყველა დაინახავს, როდესაც ეს კანონი იქნება მოქმედებაში, მოემსახურება არა რომელიმე კონკრეტული პარტიის ან პოლიტიკოსის ინტერესს, არამედ მოემსახურება ჩვენი საზოგადოების, ჩვენი დემოკრატიული პროცესების გაჯანსაღებას. გამჭვირვალობა არის აუცილებელი მდგენელი პოლიტიკაში. დღეს ვხედავთ რომ არასამთავრობო სექტორს, მედიას აქვს უმნიშვნელოვანესი და უდიდესი ზეგავლენა საზოგადოებრივი აზრის ფორმირებაში. და მაშინ როდესაც ჩვენ პოლიტიკურ სპექტრში გვაქვს უმაღლესი სტანდარტი გამჭვირვალობის, ზუსტად ანალოგიურისკენ გადადგმული ნაბიჯია გამჭვირვალობის კანონი.
რაც შეეხება პარტნიორობას, თავდაცვის და უსაფრთხოების სფეროში, პირველ რიგში მინდა ხაზი გავუსვა იმას რომ ჩვენ გვაქვს, ძალიან ბევრი წლების გამოცდილება თანამშრომლობის ჩვენს დასავლელ პარტნიორებთან, რომელიც სასარგებლო იყო საქართველოსთვის და ასევე სასარგებლო იყო ჩვენი დასავლელი პარტნიორებისთვის. მათ შორის აშშ-თვის, გერმანიისთვის საფრანგეთისთვის და ნებისმიერი ევროკავშირის წევრი სახელმწიფოსთვის, ვისთან ერთადაც საქართველო მხარდამხარ იდგა მსოფლიო უსაფრთხოების დასაცავად. ამის გარდა სხვა მიმდინარე საკითხი თანამშრომლობის ნაწილში, რომელიც ჩვენ გვაქვს ეს არის ურთიერთსასარგებლო პროცესები და ეს პროცესები არის მნიშვნელოვანი იმისთვის, რომ გამოცდილება მიიღონ როგორც საქართველოს თავდაცვის და უსაფრთხოების წარმომადგენლებმა ასევე ჩვენმა პარტნიორებმა და ეს ზრდის ურთიერთთავსებადობას.
როდესაც იქნა მიღებული გადაწყვეტილება წვრთნების გადატანასთან დაკავშირებით ეს ჩვენთვის გაუგებარი და დასანანი გადაწყვეტილებაა. მაგრამ გეტყვით იმასაც, რომ თანამშრომლობა, რომელიც გვაქვს პენტაგონთან თავდაცვის სამინისტროს აქტიურად გრძელდება და ეს თანამშრომლობა მიმდინარეობს“,-განაცხადა ირაკლი ჩიქოვანმა.