„მინდა, რომ სასამართლო ღია და საჯარო იყოს“, – ამის შესახებ ე.წ. ციანიდის საქმეზე ბრალდებულმა დეკანოზმა გიორგი მამალაძემ სასამართლო პროცესზე განაცხადა.
თბილისის საქალაქო სასამართლოში დეკანოზ გიორგი მამალაძისთვის აღკვეთის ღონისძიების საქმეზე მსჯელობენ.
ბრალდების მხარე აღკვეთის ღონისძიების სახით პატიმრობის ვადის გაგრძელებას ითხოვს. დაცვის მხარე კი დეკანოზ გიორგი მამალაძისთვის აღკვეთის ღონისძიების სახით შეფარდებული პატიმრობის შეცვლას, ალტერნატიულ ღონისძიებად კი გირაოს მოითხოვს.
ამასთან, სასამართლო პროცესზე პროკურატურამ დააყენა შუამდგომლობა სასამართლო სხდომების დახურვის შესახებ, რაც მოსამართლემ ნაწილობრივ დააკმაყოფილა. მხარეები პროკურატურის შუამდგომლობას განიხილავენ, რომლითაც უნდა გადაწყდეს, მთლიანად დაიხურება თუ არა დეკანოზის აღკვეთის ღონისძიების გადასინჯვის სასამართლო პროცესი.
ე.წ. ციანიდის საქმესთან დაკავშირებით, დეკანოზი გიორგი მამალაძე 13 თებერვალს დააკავეს. მას აღკვეთის ღონისძიების სახით, პატიმრობა აქვს შეფარდებული.