რუსთავში, თოდრიის ქუჩაზე, გამთენიისას რამდენიმე კომერციული ობიექტი გაქურდეს. ინფორმაციას inforustavi ავრცელებს.
სააგენტოს ცნობით, მძარცველებმა ტანსაცმლის, სასურსათო, საკანცელარიო მაღაზიები, სილამაზის სალონი და ექიმ-ჰომეოპათის ოფისი გაქურდეს. მძარცველებმა ექიმ-ჰომეოპათის ოფისში განთავსებული შესაწირი ყუთიდან, ხოლო საკანცელარიო მაღაზიიდან 200 ლარამდე თანხა წაიღეს.
რაც შეეხება დანარჩენ კომერციულ ობიექტებს, აქ მძარცველებს თანხა არ დახვდათ.
გამოცემისთვის მიცემულ ინტერვიუში დაზარალებულები აღნიშნავენ, რომ ეს გაქურდვის უკვე მეორე შემთხვევაა. პირველი შემთხვევა ერთი თვის წინ მოხდა და ჯამში, სხვადასხვა ობიექტებიდან წაღებული თანხა 1000 ლარი იყო.
ერთ-ერთი ობიექტის თანამშრომელი აცხადებს, რომ ერთი თვის წინ მომხდარ ფაქტზე ამ დრომდე არავინ დაუკავებიათ. დაზარალებულის ვარაუდით, მძარცველები არასრულწლოვანი პირები არიან.
შემთხვევის ადგილზე მობილიზებული იყო კრიმინალური და საპატრულო სამსახურის ეკიპაჟები. დაზარალებულები დილიდან პოლიციის განყოფილებაში იკითხებიან.