ვერაფერი საზოგადოების აზრს ვერ შეცვლის და მათ გადაწყვეტილებაზე გავლენას ვერ იქონიებს, – განაცხადა მცხეთაში „ქართული ოცნების“ მაჟორიტარმა დეპუტატმა, „ხალხის ძალის“ ლიდერმა დიმიტრი ხუნდაძემ.
მისი თქმით, ოპოზიცია პირველად არ ითხოვს ტექნიკური მთავრობის ჩამოყალიბებას, თუმცა ამჯერადაც ისინი ვერაფერს მიაღწევენ.
„სალომე ზურაბიშვილი რას აპირებს, ვფიქრობ თავადაც არ იცის, მაგრამ სალომე ზურაბიშვილი რას აკეთებს არის ის, რასაც უკვეთავენ. ტექნიკური მთავრობის წარდგენის ინიციატივა არ არის პირველი. გახსოვთ ალბათ, როცა საზოგადოება რუსთაველზე შეკრიბეს იმის საკითხავად – „გსურთ თუ არა ევროპა“ და შემდეგ, არასამთავრობო სექტორის უდიდესი ნაწილი შეხტა სცენაზე და მოითხოვეს ტექნიკური მთავრობის ჩამოყალიბება. ესენი ისევ ამ ორომტრიალში არიან, მაგრამ ისევე უშედეგოდ დასრულდება, როგორც მაშინ. საზოგადოება ხედავს, რომ ასეთი დაკვეთები გარედან, რომლის შემსრულებელიც, სამწუხაროდ, ოპოზიციური შტაბის ხელმძღვანელი სალომე ზურაბიშვილი აღმოჩნდა, მხოლოდ აურზაურის შემოსატანად და ნიჰილიზმის დასათესადაა“,- აღნიშნა ხუნდაძემ.
მან ასევე ისაუბრა წინასაარჩევნო პერიოდზეც, რომელიც მისივე თქმით, მშვიდად მიმდინარეობს.
„საარჩევნო პროცესი იმაზე მშვიდად მიმდინარეობს, ვიდრე ეს ზოგადად არჩევნებს ჩვევია. საზოგადოებას უკვე ეტყობა რა გადაწყვეტილებას მიიღებს და სწორედ ეს აწუხებთ ოპოზიციას და მათ პატრონებს. ოპოზიციას არ სურს სიმშვიდე. არჩევნების დაწყების დღიდან, გახსოვთ, რომ ისინი არჩევნების გაყალბებაზე საუბრობდნენ. ვერაფერი საზოგადოების აზრს ვერ შეცვლის და მათ გადაწყვეტილებაზე გავლენას ვერ იქონიებს“,- განაცხადა ხუნდაძემ.