რუსული სამხედრო გემი ხმელთაშუაზღვის აღმოსავლეთით იმ ტერიტორიისკენ მიემართება, სადაც ამერიკის ორი რაკეტმზიდი დგას. სირიის მიმართულებით რაკეტები სწორედ აქედან გაუშვეს. ამის შესახებ ინფორმაციას Fox News ავრცელებს.
როგორც მედიასაშუალება აშშ-ის თავდაცვის უწყების წარმომადგენელზე დაყრდნობით წერს, რუსულმა სამხედრო გემმა ბოსფორის სრუტე რამდენიმე საათის წინ გადაკვეთა.
ამ დროისათვის, რუსული სამხედრო გემი ხმელთაშუა ზღვის აღმოსავლეთით იმყოფება და მიემართება აშშ-ის ტექნიკისკენ.
Fox News-ის წყაროს ინფორმაციით, ერთ-ერთი ამერიკული რაკეტმზიდი, საიდანაც სირიის მიმართულებით რაკეტა გაუშვეს, გადასაიარაღებლად სხვა ადგილას მიემართება.
როგორც რუსული სააგენტო TASS წერს, სამხედრო ხომალდი სირიის ქალაქ ტარტუსში სტანდარტულ რეისს ახორციელებს.
„რუსული სამხედრო გემი სირიაში, კერძოდ ტარტუსში, ლოგისტიკურ ბაზას ესტუმრება“, – განუცხადა წყარომ სააგენტო TASS-ს.