მიხეილ სააკაშვილის საქმეზე, რომელიც გირგვლიანის ეპიზოდს შეეხება ნინო ბურჯანაძე დაიკითხა.
ბურჯანაძის განცხადებით, მან ბრიუსელში ვიზიტის დროს, კოტე ზალდასტანიშვილისგან გაიგო გირგვლიანის გარდაცვალების შესახებ, რის შემდეგაც ამ საქმით დაინტერესდა. ნინო ბურჯანაძის თქმით, საქართველოში ჩამოსვლის შემდეგ, ის მიხეილ სააკაშვილს ელაპარაკა, რა დროსაც ექსპრეზიდენტმა ბურჯანაძეს ის გვარები დაუსახელა, რომლებიც შემდეგ განსასჯელის სკამზე აღმოჩნდნენ.
პარტია “დემოკრატიული მოძრაობის” თავმჯდომარემ, დაკითხვაზე პოლიტიკოსთა გვარები დაასახელა, რომელთაც მწვავე პოზიცია ჰქონდათ და თვლიდნენ, რომ ახალაია არ უნდა გაწირულიყო. ბურჯანაძის მიერ დასახელებული ადამიანები არიან: გიგა ბოკერია, გიგი უგულავა, ნიკოლოზ რურუა და კახა ლომაია.
ბურჯანაძის თქმით, ის განსაკუთრებით გამოყოფს გიგა ბოკერიას, რომელიც ახალაის დასჯის წინააღმდეგი იყო. ნინო ბურჯანაძის განცხადებით, შეწყალების თაობაზე მიღებული გადაწყვეტილება მისთვის მოულოდნელი იყო. ის შესაძლო გარიგებაზეც ლაპარაკობს: “სააკაშვილი არ იყო ის პრეზიდენტი, რომელსაც არ ეცოდინებოდა თუ ვის იწყალებდა,” – განაცხადა ნინო ბურჯანაძემ.