რუსეთის მიერ უკრაინაზე თავდასხმების გაძლიერების ფონზე, ევროპარლამენტის თავმჯდომარე რობერტა მეცოლა მხარს უჭერს კიევისთვის „ტაურუსის“ ტიპის ფრთოსანი რაკეტების დაუყოვნებლივ გადაცემას. ინფორმაციას ამის შესახებ გერმანული მედია ავრცელებს.
გერმანულ მედიასთან ინტერვიუში მეცოლამ დადებითად უპასუხა კითხვებს იმის შესახებ, მხარს უჭერენ თუ არა ევროკავშირის ქვეყნები და აშშ შორ მანძილზე მოქმედი რაკეტების რუსეთის ტერიტორიის სიღრმეში მდებარე სამიზნეების წინააღმდეგ გამოყენებას და უნდა მიაწოდოს თუ არა გერმანიამ უკრაინას „ტაურუსის“ ტიპის რაკეტები.
„დიახ, ეს არის ევროპარლამენტის პოზიციაც. ამ მოთხოვნას ფართო მხარდაჭერა აქვს. ვნახოთ, გამოიწვევს თუ არა ეს შესაბამის ცვლილებას ბუნდესტაგის არჩევნების შემდეგ“, – განაცხადა ევროპარლამენტის პრეზიდენტმა.
მეცოლამ განაცხადა, რომ შესაძლოა, ასეთი ცვლილება უფრო ადრეც მოხდეს, რადგან გერმანიის მმართველ კოალიციაში არსებობს განსხვავებული პოზიციები „ტაურუსების“ კიევისთვის მიწოდების საკითხზე.
რობერტა მეცოლამ აღნიშნა, რომ უკრაინელ ჯარისკაცებს სასწრაფოდ სჭირდებათ დახმარება. ევროპარლამენტის პრეზიდენტის განცხადებით, უკრაინის პრეზიდენტმა სამართლიანად გაუსვა ხაზი, რომ უკრაინას არ შეუძლია, უსასრულოდ ელოდოს სამხედრო დახმარებას, რადგან რომელიმე დასავლურ ქვეყანაში არჩევნებია, მაშინ როდესაც უკრაინაში ადამიანები ომში ყოველდღე იღუპებიან. მან შეშფოთება გამოხატა, რადგან რუსეთი აძლიერებს ომს და ინტენსიურს ხდის სარაკეტო დარტყმებს, რაც მრავალრიცხოვან სამოქალაქო მსხვერპლს იწვევს.
ცნობისთვის, კანცლერი ოლაფ შოლცი, დიდი ხანია, უარს აცხადებს „ტაურუსის“ უკრაინისთვის გადაცემაზე. მას ეშინია, რომ გერმანია, შესაძლოა, უშუალოდ ჩაერთოს რუსეთსა და უკრაინას შორის ომში. გერმანიის მმართველ კოალიციაში შემავალი „თავისუფალი დემოკრატები“ და „მწვანეები“ მხარს უჭერენ ასეთი რაკეტების უკრაინისთვის მიწოდებას.
დისკუსია ბოლო დღეებში კვლავ გამძაფრდა მას შემდეგ, რაც აშშ-ის პრეზიდენტმა ჯო ბაიდენმა, უკრაინას ნება დართო, გამოიყენოს რუსეთის სიღრმეში დარტყმებისთვის ამერიკული „ატაკამსის“ რაკეტები, რომელთა მოქმედების რადიუსი 300 კმ-ია, „ტაურუსის“ მოქმედების რადიუსი კი 500 კმ-ს შეადგენს.