ჩვენ საქმე გვაქვს წამქეზებლურ დეზინფორმაციასთან – დეზინფორმაცია, რომელიც გამოყენებულია თრობის სტიმულირებისთვის. რა თქმა უნდა, ეს არ არის შემთხვევითი, – განაცხადა გადაცემაში „იმედი LIVE“ პარლამენტის წევრმა, დიმიტრი ხუნდაძემ, საქართველოში ევროკავშირის ელჩის პაველ ჰერჩინკის განცხადებაზე, რომელიც ბოლო დღეებში განვითარებულ მოვლენებს ეძღვნებოდა.
ხუნდაძის თქმით, პრემიერის მიერ მმართველ გუნდთან ერთად შემუშავებული განცხადებაში სრულიად ნათლად იყო დაფიქსირებული ერთგულება ევროინტეგრაციისადმი. მისივე განმარტებით, განცხადებაში ნათქვამი იყო, რომ მმართველი გუნდი არ იქნებოდა ევროკავშირთან მოლაპარაკების წარმოების, დაწყების ინიციატორი. მან ასევე გაიხსენა შარლ მიშელის განცხადებაც, რომ ევროკავშირი 2030 წლამდე გაფართოებას არ აპირებს. დეპუტატის განცხადებით, საქმე გვაქვს ზოგად პროცესთან საქართველოსთან მიმართებით, რომელიც ადრე დაიწყო. კერძოდ, ეს უკავშირდება საქართველოს უკრაინის ომში ჩართვისა და რუსეთისთვის სანქციებთან მიერთების საკითხებს.
„უთანხმოების ძირითადი მიზეზი არის ის, რომ საქართველო არ ემორჩილება ასეთ ერთმნიშვნელოვან დაკვეთებს. ვფიქრობ, ევროკავშირსაც ასეთი „ჯიუტი“ ქვეყანა არ სურს, რომ აჩვენოს სხვა ქვეყნებსაც, რამეთუ ეს შესაძლოა, გადამდები იყოს“, – დასძინა ხუნდაძემ.