უკრაინაში ომის დაწყებიდან თითქმის სამი წლის შემდეგ პრეზიდენტ ვოლოდიმირ ზელენსკის პოპულარობა იკლებს და უკრაინელთა მცირე ნაწილი განიხილავს მას შემდეგ პრეზიდენტად, – წერს ბრიტანული გამოცემა The Times-ი.
კიევის სოციალური მონიტორინგის ცენტრის მიერ გამოქვეყნებული საზოგადოებრივი აზრის გამოკითხვის თანახმად, ზელენსკის მეორე ვადით არჩევას მხოლოდ 16 პროცენტი დაუჭერდა მხარს. გამოკითხვამ ასევე აჩვენა, რომ დაახლოებით 60 პროცენტი ამჯობინებს, რომ ზელენსკიმ მეორე ვადით არ იყაროს კენჭი.
„ძალიან რთულია იყო პოპულარული პრეზიდენტი, როდესაც უკვე სამი წელია სრულმასშტაბური ომი გაქვს. ხალხი დაიღალა და თითქმის ყველას ჰყავს ვინმე, ვინც დაეღუპა. ეს დიდი გამოწვევაა ზელენსკისთვის“, – განაცხადა უკრაინელმა დეპუტატმა, ალექსანდრა უსტინოვამ.
გამოკითხვაში ზელენსკის უსწრებს ვალერი ზალუჟნი, უკრაინის შეიარაღებული ძალების ყოფილი მთავარსარდალი, რომელიც ივლისიდან ბრიტანეთში ელჩად მუშაობს.
გამოცემა The Times-ი აღნიშნავს, რომ ჯერჯერობით უცნობია, როდის შეძლებენ უკრაინელები მომავალი პრეზიდენტის არჩევას. ზელენსკის საპრეზიდენტო ვადა მაისში ამოეწურა, მაგრამ ახალი არჩევნები გაურკვეველი ვადით შეჩერდა საომარი მდგომარეობის გამო.