„საფრანგეთის სამართალდამცველმა ორგანოებმა პარიზისა და ბრიუსელის ტერაქტის ორგანიზატორის ლეპტოპში აღმოაჩინეს ინფორმაცია, რომ ევროპის საფეხბურთო ჩემპიონატის დროს „ისლამური სახელმწიფო“ ქალაქ მარსელში ტერაქტს ამზადებდა. ამ დღეს ინგლისის და რუსეთის ეროვნული გუნდების მატჩი იმართება.
ბრიტანული გამოცემა The Sun-ის ინფორმაციით, დიდი ბრიტანეთისა და საფრანგეთის სპეცსამსახურებმა დაადგინეს, რომ ტერორისტები თავდასხმის დროს უპილოტო აპარატების, მომწამლავი ნივთიერებების და თვითმკვლელი ტერორისტების გამოყენებას აპირებდნენ. სტადიონებზე თავდასხმის გარდა, ტერორისტებმა შესაძლოა, შეტევა ბარებზე და კაფეებზე მოაწყონ, სადაც ფანატები იკრიბებიან და რომლებიც დაცული ზონის გარეთ მდებარეობს. შეგახსენებთ, რომ რამდენიმე დღის წინ გერმანულმა სპეცსამსახურებმა საფრანგეთის მხარეს ინფორმაცია მიაწოდეს, რომ „ისლამური სახელმწიფო“ „ევრო-2016“-ის დროს ტერორისტულ შეტევებს ამზადებდა.