დღეს, 18 აპრილს რუსეთის საგარეო საქმეთა მინისტრი სერგეი ლავროვი ოკუპირებულ აფხაზეთში ჩადის. ლავროვი აფხზეთში ორი დღე დარჩება და შეხვდება ე. წ. პრეზიდენტს და ე. წ. საგარეო საქმეთა მინისტრს, ასევე გახსნის რუსეთის “საელჩოს” ახალ შენობას. ლავროვის აფხაზეთში ჩასვლას საქართველოს საგარეო საქმეთა მინისტრის მოადგილე დავით ჯალაღანია გამოეხმაურა.
„რუსეთის საგარეო საქმეთა მინისტრის ვიზიტი ოკუპირებეულ აფხაზეთში არის მორიგი პროვოკაცია და არალეგალური მგზავრობა. სამწუხაროდ, არაერთხელ ყოფილა გასულ წლებშიც მსგავსი ფაქტები რუსეთის საგარეო საქმეთა მინისტრის მხრიდან. რა თქმა უნდა, ეს არის საერთაშორისო პრინციპებისა და კანონების იგნორირებით და დარღვევით განხორციელებული არალეგალური ვიზიტი, რომელიც კვლავ არის მცდელობა, საქართველოს სუვერენიტეტის ხელყოფისა. რა თქმა უნდა, ამას ეწინააღმდეგება მთელი საერთაშორისო საზოგადოება, რომელიც მტკიცედ უჭერს მხარს საქართველოს ტერიტორიულ მთლიანობას და სუვერენიტეტს და როგორც იცით, არაერთხელ ყოფილა შესაბამისი რეაქცია. მინდა ვთქვა, ღრმა რწმენით, რომ რუსეთს ასეთი პროვოკაციული ქმედებებით იმ არარსებული რეალობის შექმნა არ გამოუვა და მას ადრე თუ გვიან, რა თქმა უნდა, მოუწევს ასეთ აგრესიულ პოლიტიკაზე ხელის აღება”, – აღნიშნა დავით ჯალაღანიამ.