ჩვენი ქვეყანა თანამედროვე განვითარებულ სამყაროში ღირსეული ადგილის დამკვიდრებისკენ ისწრაფვის, ამ პროცესში საქართველოს სჭირდება საერთაშორისო პოზიციების განმტკიცება და ამ გზაზე თითოეული დიპლომატის როლი განსაკუთრებულია, – ამის შესახებ საქართველოს პრემიერ-მინისტრმა ირაკლი კობახიძემ ელჩების კონფერენცია 2024-ის დახურვის ღონისძიებაზე სიტყვით გამოსვლისას განაცხადა.
მთავრობის მეთაურმა ხაზი გაუსვა თითოეული დიპლომატის როლს ქვეყნის ინტერესების წარმოჩენასა და დაცვაში და აღნიშნა, რომ ამბასადორიალის ტრადიცია ქართული დიპლომატიის მიღწევების შეჯამებისა და საგარეო პოლიტიკის პრიორიტეტების განხილვის კარგი შესაძლებლობაა.
მთავრობის მეთაურმა აღნიშნა, რომ გრძელდება ქვეყნის ტერიტორიული მთლიანობის მშვიდობიანი აღდგენისა და დეოკუპაციის, საოკუპაციო ხაზით გაყოფილი მოსახლეობის შერიგებისა და ჩართულობის პოლიტიკა.
ირაკლი კობახიძემ კიდევ ერთხელ ხაზგასმით განაცხადა, რომ მთავრობის საგარეო პოლიტიკის ერთ-ერთი უმთავრესი პრიორიტეტი საქართველოს ევროკავშირში გაწევრიანებაა.
“ვაგრძელებთ ასოცირების დღის წესრიგით გათვალისწინებული ვალდებულებების შესრულებას და 2028 წლისთვის ამ ვალდებულებების 90%-ზე მეტი გვექნება შესრულებული. რაც შეეხება თავისუფალი ვაჭრობის შეთანხმებას (DCFTA), ვგეგმავთ, 4 წელიწადში შევასრულოთ ვალდებულებების 90%-ზე მეტი, რაც მნიშვნელოვანი ფაქტორია ევროინტეგრაციის გზაზე წარმატების მისაღწევად. ჩვენ, ფართო რეგიონში, ვართ ლიდერი დემოკრატიული და ეკონომიკური რეფორმების თვალსაზრისით და ამ დამსახურებასაც სჭირდება შესაბამისი დაფასება. 2030 წლისთვის საქართველო იქნება ყველაზე უკეთ მზად კანდიდატ ქვეყნებს შორის ევროკავშირში სრულუფლებიანი წევრობის მისაღწევად,“- აღნიშნა პრემიერ-მინისტრმა.
ირაკლი კობახიძის განცხადებით, მთავრობის ერთ-ერთი უმთავრესი საგარეო პოლიტიკური პრიორიტეტია აშშ-სთან ურთიერთობების გადატვირთვა და სტრატეგიული პარტნიორობის განახლება კონკრეტული გზამკვლევით.
“ჩვენი მიზანია, სუფთა ფურცლიდან გადავტვირთოთ ურთიერთობები აშშ-სთან, განვაახლოთ სტრატეგიული პარტნიორობა, თან ეს გავაკეთოთ კონკრეტული გზამკვლევით – არა ცარიელ ფურცელზე დატოვებული სტრატეგიული პარტნიორობით, არამედ ჩვენ გვინდა, სტრატეგიული პარტნიორობა კონკრეტული გზამკვლევით, სადაც იქნება ასახული კონკრეტული ხელშესახები შედეგები. ჩვენი მხრიდან არის აბსოლუტური ღიაობა, მზაობა ამისათვის და იმედი გვაქვს, რომ ახალი ადმინისტრაციის პირობებში ჩვენ ვიხილავთ ქმედით, შემხვედრ ნაბიჯებს“, – განაცხადა პრემიერ-მინისტრმა.
ირაკლი კობახიძის თქმით, საქართველოსთვის ძალიან მნიშვნელოვანია რეგიონული თანამშრომლობა და რეგიონში მშვიდობისა და სტაბილურობის ხელშეწყობა, რაც მომავალშიც გაგრძელდება.
მთავრობის მეთაურმა სახელმწიფო პოლიტიკის პრიორიტეტებად დაასახელა დიასპორის გაძლიერება და უფრო აქტიური ჩართულობის უზრუნველყოფა ქვეყნის განვითარებაში, ასევე ქვეყნის ცნობადობის ამაღლება, ეკონომიკური თანამშრომლობის გაღრმავება, ექსპორტის ხელშეწყობა, ინვესტიციების მოზიდვა და დაკავშირებადობის ფუნქციის მაქსიმალურად გაძლიერება.
ელჩების კონფერენციის დახურვის ღონისძიების მონაწილეებს სიტყვით მიმართეს საქართველოს პრეზიდენტმა მიხეილ ყაველაშვილმა, პარლამენტის თავმჯდომარე შალვა პაპუაშვილმა და საგარეო საქმეთა მინისტრმა მაკა ბოჭორიშვილმა.
