ევროკომისიაში განაცხადეს, რომ გაააქტიურეს გამოძიება იმის თაობაზე, დაარღვია თუ არა ილონ მასკის პლატფორმა X-მა ევროკავშირის რეგულაციები კონტენტის მოდერაციის შესახებ. ინფორმაციას ამის შესახებ სააგენტო Reuters-ი ავრცელებს.
ევროკომისიამ, რომელმაც X-ის წინააღმდეგ გამოძიება 2023 წლის დეკემბერში დაიწყო, კომპანიას სთხოვა 15 თებერვლამდე მიაწოდოს შიდა დოკუმენტაცია მისი „სარეკომენდაციო სისტემის“ შესახებ, რომელიც მომხმარებლებს კონტენტს სთავაზობს.
„დღეს ჩვენ ვდგამთ შემდგომ ნაბიჯებს, რათა ნათელი მოვფინოთ X-ის სარეკომენდაციო სისტემების შესაბამისობას ევროკავშირის ციფრული მომსახურების აქტის ვალდებულებებთან“, – განაცხადა ევროკავშირის ციფრული დირექტორატის ხელმძღვანელმა, ჰენა ვირკუნენმა.
კომისიამ ასევე გასცა შენახვის ბრძანება, რომელიც X-ისგან მოითხოვს, შეინახოს შიდა დოკუმენტები და ინფორმაცია რეკომენდაციების ალგორითმების დიზაინსა და ფუნქციონირებაში მომავალი ცვლილებების შესახებ.
