რუსეთისა და უკრაინის საკითხებში აშშ-ის სპეციალური წარმომადგენელი კიტ კელოგი უკრაინაში ვიზიტის ფარგლებში ირპენის ჰოსპიტალში მყოფ დაჭრილ უკრაინელ სამხედროებს შეხვდა და ვაშინგტონის მხრიდან კიევის მხარდაჭერაში დაარწმუნა. ინფორმაციას ამის შესახებ „სქაი ნიუსი“ ავრცელებს.
როგორც მედია წერს, ირპენის სამხედრო ჰოსპიტალში ვიზიტისას კელოგმა დაახლოებით 20 უკრაინელ სამხედროსთან ისაუბრა.
მედიის ცნობით, ერთ-ერთმა ჯარისკაცმა კელოგს ჰკითხა, შეიძლება თუ არა რუსეთის ნდობა მოლაპარაკებებში, რაზეც კელოგმა საპასუხო კითხვა დაუსვა: „შეგიძლიათ თუ არა ენდოთ იმ ადამიანებს, ვინც თქვენს გვერდით არიან, დარწმუნებული იყოთ, რომ ისინი თქვენთან არიან?“
„ეს ისე ჟღერს, თითქოს უფრო ღრმა შინაარსის კითხვას სვამთ: თქვენ ჩვენთან ხართ? ჩემი პასუხია: დიახ, ჩვენ თქვენთან ვართ“, – განაცხადა კელოგმა.
დონალდ ტრამპის წარმომადგენელმა აღნიშნა, რომ ამჟამინდელი ადმინისტრაციის მიზანია ომის ისე დასრულება, რომ შემდეგი ომი აღარ იყოს.