ფრიდრიხ მერცის კონსერვატიულ ბლოკს ბუნდესტაგის ვადამდელ არჩევნებში გამარჯვებას ულოცავს ნატო-ს გენერალური მდივანი მარკ რუტე.
„ვულოცავ ფრიდრიხ მერცს დღევანდელ გამარჯვებას გერმანიის არჩევნებში. მოუთმენლად ველოდები თქვენთან თანამშრომლობას ამ გადამწყვეტ მომენტში ჩვენი საერთო უსაფრთხოებისთვის. მნიშვნელოვანია, რომ ევროპამ გაზარდოს თავდაცვის ხარჯები და თქვენი ლიდერობა ამაში საკვანძო იქნება“, – წერს მარკ რუტე სოციალურ ქსელში.
შეგახსენებთ, რომ, ეგზიტპოლის შედეგების თანახმად, ბუნდესტაგის ვადამდელ არჩევნებში ფრიდრიხ მერცის კონსერვატიული ბლოკი „ქრისტიან-დემოკრატიული/ქრისტიან სოციალური კავშირი“ (CDU/CSU) ლიდერობს 29 პროცენტით. ალის ვაიდელის ულტრამემარჯვენე „ალტერნატივა გერმანიისთვის“ (AfD) მეორე ადგილზეა 19.5 პროცენტით, ოლაფ შოლცის მემარცხენე-ცენტრისტულ „გერმანიის სოციალ-დემოკრატიულ პარტიას“ (SPD) კი 16 პროცენტი აქვს.