ფრიდრიხ მერცის კონსერვატიულ ბლოკს ბუნდესტაგის ვადამდელ არჩევნებში გამარჯვებას ულოცავს საფრანგეთის პრეზიდენტი ემანუელ მაკრონი.
„ახლახან ვესაუბრე ფრიდრიხ მერცს, რათა მიმელოცა გერმანიის არჩევნებში გამარჯვება. ასევე, დღეს საღამოს საუბარი მქონდა ოლაფ შოლცთან, რათა გამომეხატა ჩემი მეგობრობა. ჩვენ უფრო მეტად ვართ მოწადინებულები, ერთად ვაკეთოთ დიდი საქმეები საფრანგეთისა და გერმანიისთვის და ვიმუშაოთ ძლიერი და სუვერენული ევროპისთვის. ამ გაურკვევლობის პერიოდში ჩვენ გაერთიანებული ვართ, რათა გავუმკლავდეთ მსოფლიოსა და ჩვენი კონტინენტის დიდ გამოწვევებს“, – წერს მაკრონი სოციალურ ქსელში.
შეგახსენებთ, რომ, ეგზიტპოლის შედეგების თანახმად, ბუნდესტაგის ვადამდელ არჩევნებში ფრიდრიხ მერცის კონსერვატიული ბლოკი „ქრისტიან-დემოკრატიული/ქრისტიან სოციალური კავშირი“ (CDU/CSU) ლიდერობს 29 პროცენტით. ალის ვაიდელის ულტრამემარჯვენე „ალტერნატივა გერმანიისთვის“ (AfD) მეორე ადგილზეა 19.5 პროცენტით, ოლაფ შოლცის მემარცხენე-ცენტრისტულ „გერმანიის სოციალ-დემოკრატიულ პარტიას“ (SPD) კი 16 პროცენტი აქვს.