გერმანიის პროფკავშირები (Ver.di) 10 მარტს 11 უმსხვილესი აეროპორტის გაფიცვას აანონსებენ, – იუწყება DW.
აეროპორტების თანამშრომლები ხელფასის მომატებას ითხოვენ. გაფიცვა ერთდღიანი იქნება.
პროფკავშირების განცხადებაში ნათქვამია, რომ იძულებულები არიან, საპროტესტო ქმედებებს მიმართონ, რადგან დამსაქმებლებს არ აქვთ სურვილი, დასაქმებულების მოთხოვნები დააკმაყოფილონ. კერძოდ, პროფკავშირები დასაქმებულების ხელფასის 8%-ით მომატებას ითხოვენ. მოთხოვნებს შორისაა ასევე ანაზღაურების გაზრდა მძიმე სამუშაოსთვის და დამატებითი დასვენების დღეების გამოყოფა.
„აეროპორტების თანამშრომლები ფასდაუდებელ სამუშაოს ასრულებენ, რომელიც საჰაერო ტრანსპორტის უწყვეტ მუშაობას ეხება და მნიშვნელოვან პასუხისმგებლობას ატარებენ მგზავრების უსაფრთხოებაზე. ისინიც იმსახურებენ იმას, რომ ღირსეული ხელფასი და უკეთესი სამუშაო პირობები ჰქონდეთ“, – განაცხადა პროფკავშირების წარმომადგენელმა ქრისტინა ბელემ.
გაფიცვის გამო 3400-ზე მეტი რეისი გადაიდება, რაც 510 000 მგზავრზე აისახება.
გაფიცვას გეგმავენ ბერლინ-ბრანდენბურგის, მიუნხენის, ფრანკფურტის, შტუტგარტის, კიოლნი/ბონის, დიუსელდორფის, დორტმუნდის, ჰანოვერის, ბრემენის და ლეიპციგ/ჰალეს აეროპორტები.