უკრაინამ რუსეთზე დრონებით მიმდინარე წელს ყველაზე მასშტაბური თავდასხმა მოაწყო. ინფორმაციას რუსული მედია ავრცელებს.
მედიის თანახმად, რუსეთის ჰაერსაწინააღმდეგო სისტემამ რუსეთის თავზე 337 უპილოტო საფრენი აპარატი გაანადგურა, 91 მათგანი მოსკოვში ჩამოაგდო.
უპილოტო საფრენი აპარატების შეტევის გამო რამდენიმე საათის განმავლობაში მოსკოვის უმსხვილესი აეროპორტი – „შერემეტიევო“ – დაკეტილი იყო. მოსკოვის დომოდედოვოს რაიონში დრონის ნამსხვრევები ავტომობილების პარკინგს დაეცა, რამაც ხანძარი გამოიწვია, რა დროსაც 20 მანქანა დაიწვა.
მოსკოვის ოლქის გუბერნატორის, ანდრეი ვორობიოვის თქმით, დრონების შეტევის შედეგად ოლქში ცხრა ადამიანი, მათ შორის ოთხი წლის ბავშვი დაშავდა. ერთი ადამიანი გარდაიცვალა.
რუსეთს თავდაცვის სამინისტრო, თავის მხრივ, ავრცელებს ინფორმაციას, რომ 126 უპილოტო საფრენი აპარატი კურსკის ოლქში ჩამოაგდეს, 38 – ბრიანსკის ოლქში, 25 – ბელგოროდის ოლქში, 22 – რიაზანის ოლქში, 10 – კალუგის ოლქში, 8 – ლიპეცკისა და ორიოლის ოლქებში, 6 – ვორონეჟის ოლქში და 3 – ნიჟეგოროდის ოლქში.