ევროპის ქვეყნებმა 11 მარტს პარიზში დაგეგმილ სამხედრო წარმომადგენლების შეკრებაზე აშშ-ი არ მიიწვიეს.
ამის შესახებ ინფორმაციას „ესოშიეთიდ პრესი“ ავრცელებს.
გამოცემის ცნობით, შეხვედრას დაესწრება ნატო-ს ყველა წევრი ქვეყანა აშშ-ის გარდა, ასევე ირლანდიის, კვიპროსის და ავსტრიის არმიის ხელმძღვანელები. ეს სამი ქვეყანა ნატო-ს წევრი არ არის, მაგრამ ევროკავშირის წევრები არიან.
სამხედრო მაღალჩინოსნების შეკრებას დისტანციურად დაესწრებიან ავსტრალიის, ახალი ზელანდიის, იაპონიის და სამხრეთ კორეის წარმომადგენლები. შეხვედრაზე წარმოდგენილი იქნება უკრაინაც.
ევროპელმა პოლიტიკოსმა „ესოშიეთიდ პრესს“ განუცხადა, რომ შეერთებული შტატები არ არის მიწვეული, რადგან ევროპულ ქვეყნებს სურთ აჩვენონ, რომ შეუძლიათ პასუხისმგებლობა აიღონ ომის შემდგომი უკრაინისთვის უსაფრთხოების ჩარჩოს დიდ ნაწილზე.