პოლონეთის პრემიერ-მინისტრმა, დონალდ ტუსკმა უცხო ქვეყნები, მისი პარტიის – „სამოქალაქო პლატფორმის“ – კომპიუტერებზე კიბერშეტევის განხორციელების გზით, მომავალ საპრეზიდენტო არჩევნებზე გავლენის მოხდენის მცდელობაში დაადანაშაულა.
„არჩევნებში უცხოური ჩარევა იწყება – „სამოქალაქო პლატფორმის“ საინფორმაციო ტექნოლოგიების (IT) სისტემაზე კიბერშეტევა განხორციელდა. უსაფრთხოების სამსახური აღმოსავლურ ხელწერაზე მიუთითებს“, – დაწერა ტუსკმა სოციალურ მედია-პლატფორმა „იქსზე“ (ყოფილი „ტვიტერი“).
ტუსკს არ განუმარტავს, რას გულისხმობდა „აღმოსავლურ ხელწერაში“. კითხვაზე, მოიაზრებიან თუ არა ამაში რუსეთის ან ბელარუსის კიბერდამნაშავეები, ტუსკის ოფისის ხელმძღვანელმა, იან გრაბიეცმა განაცხადა, რომ პოლონეთის უსაფრთხოების სამსახურების სახელით საუბარი არ სურს, თუმცა, იქვე დასძინა, რომ აღმოსავლეთის კიბერდანაშაულის სააგენტოებს რუსეთი ხშირად აფინანსებს.
გრაბიეცმა პოლონურ სახელმწიფო მედია-საშუალება PAP-ს განუცხადა, რომ კიბერშეტევა იყო მცდელობა, მიეღოთ წვდომა „სამოქალაქე პლატფორმის“ ოფისისა და პოლონეთის საარჩევნო მოხელეების კომპიუტერებზე. კიბერთავდასხმა დაახლოებით თორმეტი საათის განმავლობაში გაგრძელდა.
საპრეზიდენტო არჩევნები პოლონეთში მაისშია დაგეგმილი. ვარშავის მერი და ტუსკის „სამოქალაქო პლატფორმის“ წევრი, რაფალ ტშასკოვსკი საზოგადოებრივი აზრის უმეტეს გამოკითხვებში დიდი უპირატესობით ლიდერობს.
ოპოზიციონერი დეპუტატი და ყოფილი მინისტრი, მიხალ ვოში ტუსკის განცხადებებს ნაკლებად ენდობა და მიანიშნებს, რომ ტუსკი, ტშასკოვსკის სასარგებლოდ, საპრეზიდენტო არჩევნებით მანიპულირებისთვის ემზადება: „ეს აშკარად დონალდ ტუსკის პრელუდიაა რუმინული ან ფრანგული სცენარისთვის. ისინი საპრეზიდენტო არჩევნებისთვის ემზადებიან“.
ამით ვოშმა, სავარაუდოდ, იმ ფაქტზე მიანიშნა, რომ რუმინეთის პრეზიდენტობის კანდიდატს, კელინ ჯორჯესკუს, მას შემდეგ, რაც ქვეყნის საპრეზიდენტო არჩევნების პირველ ტურში პირველ ადგილზე გავიდა, ხელახალ არჩევნებში მონაწილეობა აეკრძალა, ხოლო საფრანგეთის „ეროვნული გაერთიანების“ ლიდერი, მარინ ლე პენი საფრანგეთის 2027 წლის საპრეზიდენტო არჩევნებს ევროპარლამენტის სახსრების არამიზნობრივად ხარჯვის ბრალდების გამო ჩამოაცილეს.