პუტინის მიერ გამოცხადებული სამდღიანი ზავი საკმარისი არ არის, საჭიროა სამართლიანი და ხანგრძლივი მშვიდობა, – ამის შესახებ იტალიის პრემიერ-მინისტრმა, ჯორჯია მელონიმ Corriere della Sera-სთან ინტერვიუში განაცხადა.
მელონის თქმით, იტალია მხარს უჭერს აშშ-ის პრეზიდენტის, დონალდ ტრამპის ძალისხმევას და მოხარულია, რომ უკრაინის პრეზიდენტმა გამოხატა მზადყოფნა უპირობო ზავისთვის. ჯორჯია მელონის თქმით, ზელენსკიმ ამით აჩვენა, რომ უკრაინაც მიისწრაფვის მშვიდობისკენ.
„ახლა რუსეთმა უნდა აჩვენოს იგივე, რადგან პუტინის მიერ მეორე მსოფლიო ომში გამარჯვების წლისთავზე გამოცხადებული სამდღიანი ზავი სხვა რამეა და აშკარად არასაკმარისია. მშვიდობა უნდა იყოს სამართლიანი და ხანგრძლივი“, – განაცხადა მელონიმ.
როგორც იტალიის პრემიერ-მინისტრმა აღნიშნა, პირველ რიგში, ეს ნიშნავს უსაფრთხოების საიმედო გარანტიებს.
მელონი მიიჩნევს, რომ ევროკავშირ-აშშ-ის სამიტის ჩასატარებლად ჯერ დრო არ დამდგარა. როგორც მელონიმ განაცხადა, აშშ-ის პრეზიდენტსა და სხვა ლიდერებს აცნობა არა მხოლოდ ნატო-ს სამხედრო გაძლიერების, არამედ აშშ-ისა და ევროკავშირის დაახლოების გზების ძიების აუცილებლობის შესახებ, რადგან „მსოფლიო არენაზე ჩნდებიან სხვა სახელმწიფოები, რომლებიც დომინირებისკენ მიისწრაფვიან“.
„ჩვენ არასდროს დაგვისახელებია თარიღი. ჩვენ ვმუშაობთ ამაზე, მაგრამ, ცხადია, ეს მხოლოდ ჩვენზე არ არის დამოკიდებული. შეხვედრებმა რომ შედეგები მოიტანოს, საჭიროა დრო. ისინი გულდასმით უნდა მომზადდეს, არ უნდა იყოს ფორმალური, არამედ – შინაარსობრივი. ახლა ჯერჯერობით დრო არ დამდგარა“, – აღნიშნა მელონიმ.
ცნობისთვის, რუსეთის პრეზიდენტმა, ვლადიმერ პუტინმა მეორე მსოფლიო ომში გამარჯვების 80 წლისთავის აღსანიშნავ დღეებში, 9-11 მაისს უკრაინაში ცეცხლის შეწყვეტა გამოაცხადა.