საქართველოს პრემიერ-მინისტრი ირაკლი კობახიძე სოციალურ ქსელში პოსტს აქვეყნებს.
”ვაზიანში, საქართველოს თავდაცვის ძალების დაარსებიდან 34 წლისთავთან დაკავშირებულ ღონისძიებაზე ვიმყოფებოდი.
როგორც სიტყვით გამოსვლისას განვაცხადე, გერქვას საქართველოს ჯარისკაცი, ეს ერთდროულად უდიდესი პატივი და უზარმაზარი პასუხისმგებლობაა. ამ სტატუსის ღირსებით ტარებას დიდი შრომა და თავდადება სჭირდება, სწორედ ამიტომ იმსახურებს საქართველოს ჯარისკაცი ხალხის ნდობასა და სიყვარულს.
ჯარისკაცებს თავდაცვის ძალების დაარსებიდან 34 წლისთავი მივულოცე და გამოჩენილი სიმამაცისა და სამშობლოს სამსახურისთვის მადლობა გადავუხადე.
განვაცხადე, რომ დღევანდელი დღე განსაკუთრებულია საქართველოს უახლესი ისტორიისთვის. ეს არის დღე, როდესაც დიდი სიამაყით წარმოვაჩენთ ჩვენს დამოუკიდებლობასა და სუვერენიტეტს. დღეს ვზეიმობთ ჩვენი ქვეყნის მშვიდობიან და ნათელ მომავალს. ამ წლების განმავლობაში საქართველოს თავდაცვის ძალების წინაშე არსებული არაერთი რთული გამოწვევა გადაილახა.
სიტყვით გამოსვლისას ჩვენს ჯარისკაცებს დავპირდი, რომ ჩვენი თავდაცვის ძალების გაძლიერება, ჩვენი ქვეყნის წინსვლა და განვითარება მომავალშიც გაგრძელდება. ჩვენი სამხედროების ყველა საბრძოლო წარმატება შეუპოვრობის, სიმტკიცისა და მებრძოლი ბუნების გამოვლენის უამრავ მაგალითს აერთიანებს. მათ ღირსებას, პროფესიონალიზმსა და თავდადებას ყველა ერთხმად აღიარებს, საქართველოში და მის ფარგლებს გარეთ.
დღევანდელი დღე განსაკუთრებულად მივულოცე საქართველოს ტერიტორიული მთლიანობისთვის ბრძოლებსა და საერთაშორისო მისიებში დაღუპული ჯარისკაცების ოჯახებს და შეიარაღებული ძალების ვეტერანებს.
აღვნიშნე, რომ ჩვენს გმირებს არასოდეს დავივიწყებთ და ყოველთვის სათანადო პატივს მივაგებთ. ქართველი ხალხის მეხსიერებიდან არასოდეს წაიშლება სამშობლოსთვის თავგანწირვისა და გმირობის მაგალითები, რომლებითაც თითოეული ჩვენგანი ამაყობს. ქედს ვიხრი ჩვენი გმირების ნათელი ხსოვნის წინაშე. განსაკუთრებული პატივისცემა გამოვხატე შეიარაღებული ძალების ვეტერანების მიმართ, რომელთა დიდ ნაწილს სამშობლოს სამსახური ჯანმრთელობის ფასად დაუჯდა, თუმცა ისინი დღესაც მზად არიან თავდადებისთვის.
აღვნიშნე ისიც, რომ ქართული თავდაცვის ძალები ჩვენი სუვერენიტეტისა და დამოუკიდებლობის ურყევი გარანტია. სწორედ ამიტომ ჩვენი მთავრობის პრიორიტეტთა შორის, თქვენ უპირველესი ადგილი უჭირავთ მათ. დარწმუნებული ვარ, ქვეყნის თავდაცვისა და უსაფრთხოების უზრუნველყოფის საქმეში სულ უფრო ძლიერი და საიმედო ძალა იქნებიან და ჩვენი ქვეყნისა და ხალხის იმედს ყოველთვის გაამართლებენ.
ჩვენი ხელისუფლება, ისევე როგორც დღემდე, მომავალშიც უზრუნველყოფს ქვეყანაში მშვიდობასა და სტაბილურობას.
საქართველოს თავდაცვის ძალების დაარსებიდან 34 წლისთავთან დაკავშირებული ღონისძიება ვაზიანში, მე-4 ქვეითი ბრიგადის სამწყობრო მოედანზე გაიმართა.
სამწყობრო მოედანზე მოწყობილ პირად შემადგენლობას თავდაცვის ძალების დღე მიულოცეს საქართველოს პრეზიდენტმა მიხეილ ყაველაშვილმა, პარლამენტის თავმჯდომარე შალვა პაპუაშვილმა, ვიცე-პრემიერმა, თავდაცვის მინისტრმა ირაკლი ჩიქოვანმა და თავდაცვის ძალების მეთაურმა, გენერალ-მაიორმა გიორგი მათიაშვილმა. ასევე დავათვალიერეთ სამწყობრო მოედანზე გამოფენილი თავდაცვის ძალების ტექნიკა და შეიარაღება.
ღონისძიების დაწყებამდე პრეზიდენტთან, პარლამენტის თავმჯდომარესთან, თბილისის მერთან, თავდაცვის მინისტრთან და თავდაცვის ძალების მეთაურთან ერთად, ბრიგადის ტერიტორიაზე მდებარე მემორიალი გვირგვინით შევამკე და პატივი მივაგეთ დაღუპული მებრძოლების ხსოვნას.
