რას შეიძლება გულისხმობდეს მარტა კოსი? – არ ვიცი და დარწმუნებული არ ვარ, რომ თვითონაც ზუსტად იცის. სადაც კავშირი წყდება იმ სივრცეს აუცილებლად ვინმე სხვა დაიკავებს, – განაცხადა გადაცემა „დღის ქრონიკაში“ საქართველოს პარლამენტის თავმჯდომარის პირველმა მოადგილემ გიორგი ვოლსკიმ გაფართოების საკითხებში ევროკომისრის, მარტა კოსის მიერ „რადიო თავისუფლებასთან“ მიცემულ ინტერვიუში გაკეთებული განაცხადების საპასუხოდ.
კერძოდ, მარტა კოსმა განაცხადა, რომ: „არ მომწონს, როდესაც მთავრობა სათვალავში არ იღებს ხალხს. ქართველი ხალხის დიდი სურვილია ევროპული გზით სიარული. ამაზე კვლავ ვიმუშავებთ. ვერ მივიღებ, რომ, შეიძლება, დავკარგეთ საქართველო, თუნდაც მთავრობა ერთიმეორის მიყოლებით იღებდეს კანონებს, რომლებიც აშკარად ეწინააღმდეგება ევროპულ ღირებულებებს“.
„რას შეიძლება გულისხმობდეს მარტა კოსი? – არ ვიცი და დარწმუნებული არ ვარ, რომ თვითონაც ზუსტად იცის იმიტომ, რომ არ შეიძლება თვითონ გაწყვიტო კავშირი მთლიანად და სადაც კავშირი წყდება იმ სივრცეს აუცილებლად ვინმე სხვა დაიკავებს. მითუმეტეს 20% ტერიტორიებისა ოკუპირებულია და ასეთ თემაზე მსჯელობისას, რასაკვირველია, ჩვენ დაგვტოვონ მარტო პირისპირ საოკუპაციო ძალასთან ეს არის არა თუ უნამუსობა, არამედ ორმაგი სტანდარტის ის ხარისხი, რომელიც ბავშვებს სკოლაში და საბავშვო ბაღში უნდა ასწავლო, რომ დაუშვებელია. ასე რომ, აქ არის გარკვეული თემები, იგივე კალასსაც ეხება, იგივე მის ქმრის ბიზნესს ეხება რუსეთში და ბევრი სხვა თემებია, რომლებზეც შეგვიძლია ვრცლად ვილაპარაკოთ“, – განაცხადა ვოლსკიმ.
მისი თქმით, ყველაფერი უკავშირდება დერეფანს და უკავშირდება საჭიროებას, რომ არა მხოლოდ ენერგორესურსების მოპოვებას, ტვირთების წარმოშობის ადგილებს, სასარგებლო წიაღისეულის მოპოვების ადგილებს აკონტროლებდე, არამედ ამ პროდუქციის მოძრაობის მიმართულებებსაც და დერეფნებსაც აკონტროლებდე.
„ეს ჯერ კიდევ ძველიდან მოდის. სულ არ იყო ენერგორესურსები იმ პერიოდში, როდესაც იმპერიები ცდილობდნენ დაექვემდებარებინათ საკუთარი გავლენისათვის გარკვეული ასეთი ეკონომიკური აბრეშუმის გზა დავარქვათ პირობითად, კავშირები, სავაჭრო გზები ზღვებსა და ხმელეთზე იმისათვის, რათა მათ სახელმწიფოს მეტი მიეღო. უამრავ შემთხვევაში ომის მიზეზებიც ეს იყო და არა შეცნობა ახალი სამყაროსი. ანალიტიკოსობა კარგია, მაგრამ მხოლოდ გამჭრიახი გონება და ინტელექტი არ არის აქ საკმარისი. ინფორმაციის სხვა რაოდენობა მოძრაობს ამ რეგიონთან მიმართებაში, მათ შორის რაღაც გარკვეულ ნაწილს ჩვენც ფლობთ ასე რომ, როდესაც ვგეგმავთ შემდეგ ნაბიჯს დარწმუნებული უნდა ვიყოთ, რომ ეს ყველაფერი მიმართულია იმისკენ, რომ როგორმე გადავრჩეთ და სამშვიდობოს გავიდეთ.
ამ ორაზროვნებას შეიძლება სხვადასხვა მიზეზი ჰქონდეს – ერთი ის, რომ საქართველოს ტერიტორიას არ აქვს საზღვარი ევროკავშირთან და, შესაძლოა, საქართველოს როგორც დამატებით პრობლემას განიხილავენ და არა იმ რესურს, რომელიც ჯობია, რომ ევროკავშირთან იყოს, როგორც ეს ჩვენ მიგვაჩნია და ფიქრობენ თუკი იქნება ევროკავშირთან, მაშინ ჯობია ხალხს გაუჩინონ მოლოდინები და ამ პერიოდში ხელისუფლება შეცვალონ, რომელიც ამ შუა დერეფანზე კონტროლისათვის გამოადგებათ“, – აღნიშნა ვოლსკიმ.
ვოლსკი ასევე ვიზალიბერალიზაციის საკითხს შეეხო და აღნიშნა, რომ მისი ასე უბრალოდ გაუქმება შეუძლებელია.
„ჯერ უნდა მიიღონ გადაწყვეტილება, რომ უმრავლესობამ გადაწყვიტოს ეს და არა კონსენსუსით იყოს ასეთ თემებზე მსჯელობა, რაც თავისთავად უკვე პრობლემაა. წარმოიდგინეთ, 27 ქვეყანაა და ვიღაც ამბობს თუნდაც მარტა კოსი, რომ 15-მა ქვეყანამ უნდა გადაწყვიტოს და არა 27-მა. ყველა ქვეყანას თავის ეროვნული ინტერესი აქვს. შენ თუ ერთი პრეცედენტი დაუშვი, რომ უმრავლესობა წყვეტს ევროკავშირში საკითხებს და არა კონსენსუსით მიიღება, მაშინ აზრი იკარგება საერთოდ ევროკავშირისა. ხვალ შეიძლება ნებისმიერ სხვა თემაზე სხვა ქვეყანას მიადგნენ და როგორც აინტერესებთ ისე გადაწყვიტონ. ეს მარტო საქართველოს არ ეხება.
საქართველო თავისი ეკონომიკური მაჩვენებლებით და უამრავი სხვა მაჩვენებლით აბსოლუტურად არ უკავშირდება იმ რეალობას, რასაც დღევანდელი რადიკალური ოპოზიცია ჩასჩიჩინებს ახალგაზრდებს. აბსოლუტურად სხვა ვითარებაა. 60 თუ 61 ქვეყანაა და უნდა განიხილონ რამდენად ევროკავშირისთვის მისაღებია თავისუფალი სავიზო მიმოსვლა. მათ შორის არის საქართველოც. შეიძლება სხვადასხვა მიზეზი ჰქონდეთ, მაგრამ შანტაჟის ბერკეტია. წარსულმა გამოცდილებამ გვაჩვენა, რომ ეს შანტაჟის ბერკეტია, რომელიც სცადეს გამოეყენებინათ ერთხელ, ორჯერ, სამჯერ. მაგრამ ჩვენი მაჩვენებლები სხვა არის და უკრაინის, მოლდოვის მაჩვენებლები კი სხვა“, – განაცხადა ვოლსკიმ.