ლიბერალიზმის მთავარ კრიტიკად დღეს იცით, რა ითვლება და ევროპას რა უჭირს ყველაზე მეტად? – მან თითქოს, იპოვა სიტყვა, რასაც ტოლერანტობა დაარქვა და ამ ტოლერანტობაზე უნდოდა აეგო ყველაფერი, მაგრამ ტოლერანტობა არ აღმოჩნდა საკმარის, იმიტომ რომ მთავარი სიტყვა არის კონსენსუსი, – განაცხადა „დღის ქრონიკაში“ საუბრისას საზოგადოებრივი ორგანიზაცია „პოლიტიკური არჩევანის“ დამფუძნებელმა, რომან კაკულიამ.
მისივე თქმით, ევროპამ კონსენსუსის მიღწევის მექანიზმი ვერ იპოვა. მან ისაუბრა საქართველოსა და ევროპის განმასხვავებელ ფაქტორებზე. კაკულიას განმარტებით, ყველა ცივილიზაცია იძულებულია ჩაიხედოს თავის ფესვებში, სადაც ყველგან მთავარი რელიგიაა. რელიგია კი დღის წესრიგში ღირებულებათა სისტემას აყენებს, რასაც თავის მხრივ ტრადიციები მოჰყვება.
„არ დაგვავიწყდეს, რომ დღევანდელი ევროპა შექმნა იმ გამოცდილებებმა, რომელიც აგებული იყო ადამიანის განთავისუფლებაზე ფინანსური, სულიერი და პოლიტიკური მარწუხებისგან. ეს სამივე სფერო ატერორებდა ადამიანს. ინდივიდის როლი ამიტომ გახდა მნიშვნელოვანი“, – განაცხადა კაკულიამ.
იგი მიიჩნევს, რომ საქართველოს ღირებულებები ევროპასთან დაახლოებული არ იყო და ჩვენი მისწრაფება გარკვეულწილად ზედაპირულია.
„ადამიანები დაფიქრდნენ იმ საწყისებზე, რაზეც მათი ცივილიზაცია დგას. ეს არის ის თემა, რომელშიც ჩვენ შეგვიძლია მათთან მომავალში სიღრმისეულად დავინახოთ ეს განსხვავებულობები, ამიტომ, მე ყოველთვის ვამბობდი, რომ ვიჩქაროთ ნელა“, – აღნიშნა კაკულიამ.
იგი დარწმუნებულია, რომ ღირებულებითი დისბალანსის დაძლევა შესაძლებელია.
„თავისუფლება ჩვენთვისაც მნიშვნელოვანია, მათთვისაც მნიშვნელოვანი იყო და ისინი, ჩემი აზრით, მიაგნებენ სწორედ იმას, რომ კონსენსუსის პოვნა რადგანაც ვერ შეძლეს, ამ სიტყვას მნიშვნელობას მიანიჭებენ და მერე ჩვენთანაც გაუადვილდებათ ურთიერთობა“, – დასძინა რომან კაკულიამ.