„ძლიერი პარლამენტი, ქმედითი მთავრობა, დამოუკიდებელი სასამართლო – ეს არის სამი ძირითადი შტო, ამ ძირითად პრინციპებს ეფუძნება მმართველობის სისტემა“,- ამის შესახებ საქართველოს პარლამენტის თავმჯდომარემ ირაკლი კობახიძემ ზუგდიდში, კონსტიტუციის პროექტის საერთო-სახალხო განხილვისას განაცხადა.
„საქართველოს სასამართლოს დამოუკიდებლობა – აღნიშნულთან დაკავშირებით კონსტიტუციაში მთელი რიგი ახალი გარანტიებია ჩადებული. ძლიერდება უზენაესი სასამართლო, მათ შორის ეს ეხება პერსონალურ შემადგენლობას. დღეს 13 მოსამართლეა წარმოდგენილი უზენაეს სასამართლოში და ახალი ნორმის თანახმად, უზენაესში წარმოდგენილი იქნება სულ მცირე 28 მოსამართლე, რაც გააძლიერებს ბუნებრივია ამ კონსტიტუციურ ორგანოს. დღეს პრაქტიკულ პრობლემებს წარმოშობს ეს საკადრო დეფიციტი, რომელიც არის უზენაეს სასამართლოში.
ასევე იცვლება უზენაესი სასამართლოს მოსამართლეთა წარდგენის წესი, ვენეციის კომისიის რეკომენდაციის შესაბამისად, რომელიც ამბობდა, რომ უმჯობესია წარდგენის უფლებამოსილება მიენიჭოს ამ შემთხვევაში იუსტიციის უმაღლეს საბჭოს.
დგინდება მოსამართლეთა შეუცვლელობის პრინციპი, ასევე ხაზგასმით დგინდება, რომ არცერთ შემთხვევაში არ შეიძლება სასამრთლოს ან რეორგანიზაცია, ან ლიკვიდაცია გახდეს მოსამართლის დათხოვნის საფუძველი. თქვენ გახსოვთ, რომ 2004 წელს არ იყო ასეთი ნორმა კონსტიტუცაიში და მაშინ პრაქტიკულად სრული საკადრო წმენდა განხორციელდა სასამართლო სისტემაში, სწორედ ასეთი ნორმის არარსებობიდან გამომდინარე. ასევე გამოიყენებოდა შეუცვლელობის პრინციპის არ არსებობა, იმისთვის, რომ მაგალითად, მოსამართლე გადაეყვანათ ერთი რეგიონიდან მეორეში და ამით განეხორციელებინათ ზეწოლა, გავლენა მის საქმიანობაზე და ა.შ.
გარდა ამისა, მკაფიოდ რეგულირდება იუსტიციის უმაღლესი საბჭოს ფორმირების წესი, რაც განამტკიცებს სასამრთლოს დამოუკიდებლობას და ასევე პროკურატურა გამოდის, აღმასრულებელი ხელისუფლების შემადგენლობიდან და ყალიბდება, როგორც დამოუკიდებელი კონსტიტუციური ორგანო. ეს ცვლილებები განამტკიცებს სასამართლო დამოუკიდებლობას და უზრუნველყოფს სისტემის შემდგომ განვითარებას“, – განაცხადა კობახიძემ.