უკრაინის არმიამ დაიწყო კიდევ ერთი გამოძიება 155-ე მექანიზებული ბრიგადის წინააღმდეგ, რომელიც ანა კიეველის სახელს ატარებს და რომლის წევრები, ნაწილობრივ, საფრანგეთის მიერ არიან გაწვრთნილნი და აღჭურვილნი. როგორც სააგენტო „ფრანს პრესი“ უკრაინის შეიარაღებული ძალების სპიკერზე დაყრდნობით იუწყება, ხელახალი გამოძიების დაწყება განაპირობა მედიაში გავრცელებულმა ინფორმაციიმ, რომელიც ქვედანაყოფის მეთაურების მიერ ჩადენილ სავარაუდო ფინანსურ გადაცდომებს ეხებოდა.
უკრაინის სახმელეთო ძალების სპიკერმა ბრიგადის წინააღმდეგ ახალი გამოძიების დაწყების ფაქტი დაადასტურა, მაგრამ დეტალების გამხელაზე უარი თქვა. მანამდე, „უკრაინსკაია პრავდას“ ახალი ამბების სერვერმა გაავრცელა ინფორმაცია, რომლის თანახმად, სახმელეთო ძალების მეთაურმა, მიხაილო დრაპატიმ 155-ე ბრიგადის საკითხზე დამატებითი გამოძიების ჩატარება მას შემდეგ ბრძანა, რაც ვებსაიტზე გამოაქვეყნებულ სტატიაში, სხვა საკითხებთან ერთად, საუბარი იყო ბრიგადის მეთაურის, პოლკოვნიკ ტარას მაქსიმოვის შესაძლო მონაწილეობაზე „ფიქტიური“ პრემიების გადახდასა და ქრთამის მოთხოვნაში. სტატიაში ასევე აღნიშნულია, რომ იანვრიდან მოყოლებული, ქვედანაყოფის თვითნებურად დატოვების 1200 შემთხვევა დაფიქსირდა.
კიდევ უფრო ადრე, აჟიოტაჟი გამოიწვია ცნობილი უკრაინელი ჟურნალისტის, იური ბუტუსოვის მტკიცებამ, რომ ჯერ კიდევ საბრძოლო მოქმედებებში ჩაბმამდე, ბრიგადის დაახლოებით 1700-მდე ჯარისკაცი დეზერტირად იქცა. მისივე თქმით, ორმოცდაათი კაცი ბრიგადიდან ჯერ კიდევ საფრანგეთში ყოფნის დროს გაიქცა.
ბუტუსოვმა არმიის სარდლობა ბრიგადის ქაოსურ ფორმირებამდე მიყვანაში, არასაკმარის მომზადებასა და აღჭურვაში დაადანაშაულა. ჟურნალისტის განცხადებით, ამ ომში აუცილებელი დრონები და რადიოელექტრონული საბრძოლო სისტემები ჯარისკაცებმა ვერ მიიღეს. მოგვიანებით, უკრაინის სახელმწიფო საგამოძიებო ბიურომ, დეზერტირობისა და ძალაუფლების ბოროტად გამოყენების ფაქტებზე გამოძიება დაიწყო.
ბრიგადის წარმომავლობა
გასულ წელს, უკრაინის სამხედრო მხარდაჭერის ფარგლებში, საფრანგეთი 155-ე მექანიზებული ბრიგადის წევრების მომზადებაში მონაწილეობდა. ქვედანაყოფს იაროსლავ ბრძენის უმცროსი ქალიშვილის, ანა კიეველის სახელი ეწოდა, რომელიც შუა საუკუნეების საფრანგეთში დედოფალი გახდა. ბრიგადაში 4500-მდე ჯარისკაცი უნდა ყოფილიყო. მათ დაახლოებით ნახევარს საფრანგეთი წვრთნიდა და აღჭურვილობას აწვდიდა.
ეს და კიდევ რამდენიმე სხვა ქვედანაყოფი გასულ წელს შეიქმნა, რათა უკრაინის შეიარაღებული ძალები რიცხობრივად გაეზარდა და რუსეთის საოკუპაციო არმიის წინააღმდეგ ბრძოლა გაეძლიერებინა. თუმცა, სააგენტო „ფრანს პრესის“ ცნობით, აღჭურვილობის ნაკლებობის, დაბალი მორალური სულისკვეთებისა და დეზერტირობის შესახებ ინფორმაციების გავრცელების გამო, ამ წამოწყების ირგვლივ არაერთი სკანდალი აგორდა.