“თურმე ეს პირობები ყოფილა სანატრელი პატიმრებისთვის და აქ მოხვედრისთვის ხალხი ლოცულობდა”

თურმე ეს პირობები ყოფილა სანატრელი პატიმრებისთვის და აქ მოხვედრისთვის ხალხი ლოცულობდა, სთხოვდა ვიღაცებს. ვიღაცასთან უნდა ჩაგეწყო საქმე, რომ ამ ადგილას მოხვედრილიყავი, იმ პირობებში, რაც ჩვენ ვნახეთ, – განაცხადა პარლამენტის დროებითი საგამოძიებო კომისიის წევრმა ილია ინჯიამ ხონის მეცამეტე დაწესებულების დათვალიერების შემდეგ, რომელიც 2012 წლიდან აღარ ფუნქციონირებს.

ილია ინჯიას თქმით, ადგილზე უმძიმესი სურათი დახვდათ.

„რაც კომისიაზე გავიარეთ და მოვისმინეთ ძალიან ბევრი პატიმრის ისტორია, იმ ციხეებიდან ალბათ მარტო ეს არის დარჩენილი. დანარჩენი ყველა უკვე აღარ არსებობს, ახალი შენობებია და ახალი პირობებია“, – განაცხადა ილია ინჯიამ.

საგამოძიებო კომისიის წევრები ხონში სასჯელაღსრულების ყოფილ დაწესებულებაში იმყოფებიან. ისინი ათვალიერებენ ტერიტორიას, რომელიც კარგად ასახავს თუ რა პირობებში ჰყავდა „ნაციონალური მოძრაობის“ რეჟიმს პატიმრები. დაწესებულება 2012 წლიდან აღარ ფუნქციონირებს. შენობა 700 პატიმარზე იყო გათვლილი თუმცა სააკაშვილის რეჟიმის დროს ადგილზე სასჯელს 1200-ზე მეტი მსჯავრდადებული იხდიდა.