ახლა ერთმანეთს აბულინგებენ, რომ ადგილობრივ არჩევნებში მიიღებენ თუ არა მონაწილეობას. მიიღებენ – „უი“, არ მიიღებენ – „ვაი“. ეს არის ამათი ავან-ჩავანი, – განაცხადა „დღის ქრონიკასთან“ დიასპორისა და კავკასიის საკითხთა კომიტეტის თავმჯდომარემ ირაკლი ზარქუამ ოპოზიციის იმ ნაწილზე საუბრისას, რომელსაც თვითმმართველობის არჩევნებში მონაწილეობის მიღება სურს.
მისი თქმით, ოპოზიციის იმ ნაწილისთვის, ვისაც თვითმმართველობის არჩევნებში მონაწილეობა სურს, ეს არის ერთადერთი საშუალება იმისთვის, რომ არ გაქრნენ პოლიტიკური ველიდან.
„ერთადერთი ამოცანა აქვთ ახლა, მათი პატრონებიც მიხვდნენ და დარწმუნდნენ, რომ არ გაქრნენ საერთოდ პოლიტიკური ველიდან, ამიტომ იქნებ ადგილობრივ არჩევნებზე რაღაც პროცენტი აიღონ და ამით შეინარჩუნონ დასახელება. თუ არა და მოუწევთ, როგორც „ნაცებმა“ გაყიდეს ოფისი, ახლა არიან დაქსაქსულები და დარბიან ალთას და ბალთას, აი, ასე, რომ არ იყვნენ.
ყველას ასე დაემართება. მაშინ, როდესაც შენ კუბილიუსებს, ფოტიგებს, რაისებს, კიდევ ის რომ არის, ჯი ვილსონი, დროშებს რომ ჰყიდის და ამითაც კი შემოსავლებს იზრდის, თითოეულ განცხადებაში „ფეისბუქში“ რომ „დაპოსტავს“, ფულს რომ იღებს, ეს საიდან გავიგეთ ჩვენ? „ფარას“ კანონიდან აღმოვაჩინეთ, რომ თურმე „ფორმულას“ დამფუძნებელ კეზერაშვილს 1000-1000$ გადაუხდია იმ წერილების გამოქვეყნებაში. აი, ამ კაცის იმედად რომ დარჩები და ქართველ ხალხს არ მოუსმენ, რომელიც გეუბნება, რომ მეორე ფრონტი არ არის ჩვენს ინტერესებში, რომ ლგბტ პროპაგანდა არ არის სახელმწიფო ინტერესებში, რომ ქართული ინტერესების უგულებელყოფა არ არის საქართველოს ინტერესი, ამას რომ ვერ გაიაზრებ მერე მოგიწევს სირბილი აღმა-დაღმა“, – განაცხადა ირაკლი ზარქუამ.