“სამწუხაროდ ჩვენ არ გვიკვირს, რომ საქართველოსთან მიმართებაში ევროკომისარი ასე უსამართლოდ უჭერს მხარს იმ ევროპარლამენტარს, რომელიც ასევე უსამართლოდ საუბრობს საქართველოსთან მიმართებაში”, – ასე ეხმაურება საპარლამენტო პოლიტიკური ჯგუფის “ხალხის ძალა” თავმჯდომარის მოადგილე გურამ მაჭარაშვილი, ევროკომისარ, მარტა კოსის განცხადებას.
“მათივე ევროპული ინსტიტუტების პოზიტიურ შეფასებებს საერთოდ ყურადღებას არ აქცევენ, როდესაც დადებითად არის აბსოლუტურად ყველა მიმართულება შეფასებული. ასე რომ, ეს გამოაშკარავებულია უკვე და ქართველი ხალხი და არა მხოლოდ, ძალიან კარგად ხედავს, რომ ეს არის ყველაფერი უსამართლო განცხადება. მათ უნდათ აქ არა ეროვნული ხელისუფლება, არამედ ისეთი ხელისუფლება, რომელიც მაგალითად უკრაინიზაციას მოუტანს საქართველოს. ეს უნდათ, პირდაპირ ამბობენ ამას კიდევაც”, – აცხადებს გურამ მაჭარაშვილი.
ცნობისთვის, საუბარია ევროკომისარის გაფართოების საკითხებში, მარტა კოსის განცხადებაზე, სადაც მან საქართველოს მთავრობას ბოლო დროს მიღებული კანონების გამო გააკრიტიკა, თქვა, რომ კანდიდატი ქვეყანა სხვა მიმართულებით მიდის.
გარდა ამისა, ისაუბრა სამოქალაქო საზოგადოების გაძლიერების აუცილებლობაზე და მადლობა გადაუხადა ამ მიმართულებით ჩართულობის გამო ევროპარლამენარ რასა იუკნევიჩიენეს.