აშშ-ის პრეზიდენტმა, დონალდ ტრამპმა აღმასრულებელ ბრძანებას მოაწერა ხელი, რომლის თანახმადაც 12 ქვეყნის მოქალაქეებს ამერიკაში შესვლა სრულად აეკრძალებათ. ინფორმაციას თეთრი სახლი ავრცელებს.
ტრამპის ბრძანების თანახმად, სრული აკრძალვა შეეხება ავღანეთის, ჰაიტის, ირანის, იემენის, ლიბიის, მიანმის, კონგოს რესპუბლიკის, სომალის, სუდანის, ჩადის, ეკვატორული გვინეის და ერიტრეის მოქალაქეებს. შეზღუდვები ძალაში 9 ივნისს შევა.
აშშ-ში შესვლა ნაწილობრივ აეკრძალებათ ბურუნდის, ვენესუელის, კუბის, ლაოსის, სიერა-ლეონეს, ტოგოსა და თურქმენეთის მოქალაქეებს. შეზღუდვები გარკვეული კატეგორიის ვიზებს შეეხება.
მანამდე ტრამპმა თავის სოციალურ ქსელში ბრძანების მიღებასთან დაკავშირებით ვიდეო მიმართვა გაავრცელა და ახსნა, თუ რატომ აუკრძალა რიგი ქვეყნების მოქალაქეებს ამერიკაში შესვლა.
„ჩვენ არ დავუშვებთ ამერიკაში მოხდეს ის, რაც ხდებოდა ევროპაში. ამიტომაც, ოფისში დაბრუნების პირველივე დღეს სახელმწიფო მდივანს დავავალე წარმოადგინოს უსაფრთხოების ანგარიში მაღალი რისკის შემცველი რეგიონების შესახებ და რეკომენდაციები, თუ სად შეიძლება ავამოქმედოთ შეზღუდვები“, – აღნიშნა ტრამპმა.