რუსეთის თავდაცვის სამინისტროს განცხადებით, ქვეყნის მასშტაბით ღამით 174 უკრაინული დრონი გაანადგურეს.
როგორც განცხადებაშია აღნიშნული, კიევმა იერიში მიიტანა ბრიანსკის, როსტოვის, სარატოვის, ვორონეჟის, კალუგის, კურსკის, ორლოვის, რიაზანის, ტულის, ბელგოროდის და ტამბოვის ოლქებზე, მოსკოვის რეგიონისა და ყირიმის ტერიტორიაზე.
ამასთან, მათივე ცნობით, შავი ზღვის აკვატორიაზე განადგურდა სამი უკრაინული რაკეტა.
უკრაინული მედია რუსულ „ტელეგრამის“ არხებზე დაყრდნობით წერს, უკრაინულმა ძალებმა იერიში მიიტანეს სარატოვის ოლქის ქალაქ ენგელსის ნავთობბაზაზე, რის შედეგადაც მასშტაბური ხანძარი გაჩნდა. ობიექტი გამოიყენება სტრატეგიული ავიაციის საწვავით უზრუნველსაყოფად, რომელსაც რუსეთი უკრაინაზე სარაკეტო თავდასხმებისთვის იყენებს.
რუსეთის ხელისუფლებას აღნიშნულთან დაკავშირებით კომენტარი არ გაუკეთებია, თუმცა, როგორც უკრაინული მედია წერს, სოციალურ ქსელებში გავრცელებულია ვიდეოკადრები, სადაც მასშტაბური ხანძარი ჩანს.
სარატოვის ოლქის გუბერნატორმა, რომან ბუსარგინმა დაადასტურა, რომ ქალაქში ხანძარია, თუმცა არ დაუზუსტებია, კონკრეტულად რა ობიექტზე.
„უპილოტო საფრენი აპარატების თავდასხმის შედეგად ხანძარია ენგელსის ერთ-ერთ სამრეწველო საწარმოზე“, – დაწერა ბუსარგინმა „ტელეგრამში“.