პროკურატურის შენობაში გავატარე ცხოვრებაში ყველაზე რთული 12 საათი. იქ არანაირი სურვილი არ ჰქონიათ დაკითხვის ან გამოკითხვის, ერთმანეთთან საუბარში ბექა ბასილაია [იმ დროს პროკურატურის გამომძიებელი] და ზაზა მალუძე, რომელიც იმ დროს იყო პროკურორი, საუბრობდნენ, დასჯის რომელი მეთოდი აჯობებდა. მეთოდებში იგულისხმებოდა ის, რომ დაეწყოთ ჩემი ოჯახის წვერების დაჭერა და მე უფრო მარტივად ვიშოვიდი თანხას თუ არა, მეორე მეთოდი იყო ის, რომ წავსულიყავი გლდანში და მაგ დროს კომპიუტერში რთავდა ადამიანების იმ კადრებს, რაც გლდანის ციხეში ხდებოდა და ეს ჩემთვის ძალიან რთული საყურებელი იყო, – განაცხადა “ნაციონალური მოძრაობის” რეჟიმის მიერ დაზარალებულმა ბიზნესმენმა ვალერი შოშიაშვილმა, პარლამენტის დროებითი საგამოძიებო კომისიის სხდომაზე.
შოშიაშვილის განცხადებით, მან ბასილაიას უთხრა, რომ ზურაბ ადეიშვილის შვილი და მისი შვილი კლასელები იყვნენ, რის გამოც, თავად ადეიშვილისგან მიიღო იმის დაპირება, რომ ამ სიტყვების გამო, კიდევ უფრო მეტად დაისჯებოდა.
“ჩემდაუნებურად, გულუბრყვილოდ, ასეთი რაღაც ვუთხარი, რომ ვიცოდი გენერალური პროკურორი იყო ზურაბ ადეიშვილი, ასე რატომ მწირავთ-მეთქი, ჩემი და მისი შვილი ერთ სკოლაში დადიან, კლასელები არიან-მეთქი, მაშინ გაჩერდა ბექა ბასილაია, 20 წუთი დამტოვა ოთახში და იმავე ოთახში შემოვიდა ზურაბ ადეიშვილი და მეუბნება, რომ ამ სიტყვების გამო, მე უფრო დავისჯებოდი, რატომ ვთქვი ეს ფრაზა, რომ მისი და ჩემი შვილი თანაკლასელები იყვნენ – აქ საუბარია მეორე კლასელ ბავშვებზე და არა ზრდასრულებზე. ოთახში, სადაც 12 საათი ვიყავი,მთელი კედელი დაფარული იყო ჩემი ოჯახის წევრების სურათებით, ჩემი მცირეწლოვანი შვილების, მეუღლის და დის სურათით და მაყურებინებდნენ აი ამ პროცესს. ბექა ბასილაია მეუბნებოდა, რომ ქონება, რომელიც ჩვენს ოჯახს ჰქონდა შეძენილი, უნდა ყოფილიყო გადაფორმებული კონკრეტულ პიროვნებაზე – აბსოლუტურად ყველაფერი თავიდან ბოლომდე, მაგრამ, ამ ქონებასთან ერთად, იქ იყო ჩემი დის ქონებაც.” – განაცხადა ვალერი შოშიაშვილმა.