აშშ-ის პრეზიდენტი, დონალდ ტრამპი თავს იკავებს ჩინეთზე ზეწოლისგან, რათა პეკინმა შეწყვიტოს რუსეთის მხარდაჭერა უკრაინის წინააღმდეგ ომში. ინფორმაციას ამის შესახებ სააგენტო Bloomberg-ი ამერიკელ და ევროპელ ოფიციალურ წყაროებზე დაყრდნობით ავრცელებს.
როგორც Bloomberg-ი აღნიშნავს, დონალდ ტრამპი ორიენტირებულია სხვა საკითხებზე თავის გეოპოლიტიკურ მეტოქესთან ურთიერთობებში.
აღინიშნება, რომ ჯერჯერობით ტრამპის ადმინისტრაცია ჩინეთთან ორმხრივ პრობლემებზეა ორიენტირებული. ოფიციალური პირების თქმით, უკრაინაში ომი აშშ-ისთვის სულ უფრო ნაკლებ პრიორიტეტული ხდება. თუმცა, მათ ხაზგასმით აღნიშნეს, რომ ვაშინგტონში პოზიციის შეცვლა მაინც შესაძლებელია.
სტატიაში აღნიშნულია, რომ აშშ-ის ასეთი მიდგომა ნიშნავს G7-ის ქვეყნების მრავალწლიანი პოზიციიდან გადახვევას, რომლებიც ჩინეთს მიიჩნევენ გადამწყვეტ ფაქტორად, რაც ხელს უწყობს რუსეთის ომის გაგრძელებას უკრაინის წინააღმდეგ.
მარტში „დიდი შვიდეულის“ ქვეყნების საგარეო საქმეთა მინისტრებმა საჯაროდ დაგმეს პეკინი მოსკოვის მხარდაჭერისთვის.