სტამბოლის სასამართლომ მთავარ ოპოზიციურ პარტიასთან დაკავშირებული ტელეკომპანიის მფლობელის, ჯაფერ მაჰიროღლუს დაკავების ორდერი გასცა. ინფორმაციას ამის შესახებ სააგენტო „როიტერი“ პროკურატურაზე დაყრდნობით ავრცელებს.
Halk TV-ის მფლობელის, თურქი ბიზნესმენის ჯაფერ მაჰიროღლუს დაკავების ორდერი გაცემულია სისხლის სამართლის გამოძიების ფარგლებში, რომელიც ეხება სახელმწიფო ტენდერებზე თაღლითობას საჯარო მოხელეების მოსყიდვის გზით. მაჰიროღლუ, რომელიც ლონდონში ცხოვრობს, ბრალდებებს უარყოფს.
„მე გაყალბებული განცხადებებისა და იმ ადამიანის ცილისწამების საფუძველზე მადანაშაულებენ, რომელიც არასდროს მინახავს. ამგვარად, Halk TV-ის, ხალხის ტელევიზიის მფლობელობას, დემოკრატიის, უფლებებისა და კანონის დაცვას აქვს საფასური“, – დაწერა მან სოციალურ ქსელში.
ამასთან, ბიზნესმენს არ დაუკონკრეტებია, აპირებს თუ არა თურქეთში დაბრუნებას.
გამოძიების ფარგლებში დაკავებულია ოპოზიციური „სახალხო-რესპუბლიკური პარტიის“ ზოგიერთი წევრი, მათ შორის რამდენიმე მერი.
მარტში კორუფციისა და ტერორისტული ორგანიზაციის ხელშეწყობის ბრალდებით დააკავეს სტამბოლის მერი ეკრემ იმამოღლუ, რომელიც „სახალხო-რესპუბლიკური პარტიის“ პრეზიდენტობის კანდიდატად მოიაზრებოდა. მის დაკავებას თურქეთში მასობრივი საპროტესტო გამოსვლები მოჰყვა. თურქეთის ხელისუფლება მართლმსაჯულებაზე გავლენას უარყოფს. ეკრემ იმამოღლუს დაკავების შემდეგ, თურქეთში დააკავეს ათობით ადამიანი, მათ შორის „სახალხო რესპუბლიკური პარტიის“ წევრები და სტამბოლის მუნიციპალიტეტის თანამშრომლები.