ნატო-ს სამიტზე ალიანსში უკრაინის გაწევრიანებაზე საუბარი არ იქნება. ინფორმაციას ამის შესახებ „ბლუმბერგი“ ავრცელებს.
გამოცემის ცნობით, სამიტის პროექტში ასევე არ არის განმეორებული გასული წლის დაპირება, რომელიც უკრაინისთვის 40 მილიარდი დოლარის დახმარებას ითვალისწინებდა. განცხადებაში რუსეთი ევროატლანტიკური უსაფრთხოებისთვის „საფრთხედ“ არის აღიარებული, თუმცა ის უკრაინის ომში აგრესორად არ არის მოხსენებული.
„ბლუმბერგი“ წერს, რომ დოკუმენტის პროექტში არ არის ნახსენები ჩინეთი, რომელიც ადრე უკრაინაში რუსეთის შეჭრის „გადამწყვეტ ხელშემწყობ ფაქტორად“ მოიხსენიებოდა. ნატო-ს მოკავშირეები განიხილავენ უკრაინის თავდაცვისთვის შენატანის ჩართვას იმ ახალ ხარჯვით მიზნობრივ გეგმაში, რომელსაც, სავარაუდოდ, ამ თვის ბოლოს ლიდერების სამიტზე დაამტკიცებენ.
სამიტის დეკლარაციის წინასწარი პროექტის თანახმად, ჩრდილოატლანტიკური ხელშეკრულების ორგანიზაცია ასევე შესთავაზებს მუშაობას თავდაცვის სფეროში სავაჭრო ბარიერების აღმოსაფხვრელად. მოკავშირეები აიღებენ ვალდებულებას, რომ 2032 წლისთვის მშპ-ის, მინიმუმ, 3.5 პროცენტი გამოყონ თავდაცვის ძირითად საჭიროებებზე, პლუს დამატებით 1.5 პროცენტი ინფრასტრუქტურისა და ქსელების დასაცავად და სამოქალაქო მზადყოფნის უზრუნველსაყოფად.
ცნობისთვის, ნატო-ს სამიტი 24-26 ივნისს ჰააგაში გაიმართება.