კონსტიტუციით ვალდებულებაა, რომ საგამოძიებო კომისიის მოთხოვნას დაემორჩილო, ფაქტია, საგამოძიებო კომისიის სხდომაზე არ მივიდნენ, აქ სად არის პოლიტიკა?, – ამის შესახებ იურიდიულ საკითხთა კომიტეტის თავმჯდომარემ, არჩილ გორდულაძემ განაცხადა.
მისი თქმით, პოლიტიკოსობა ინდულგენცია ვერ იქნება.
„საქართველო მომავლისკენ მიდის და საკუთარ ინტერესებზე მყარად დგას. ადამიანებმა სიტყვები შეარჩიონ, როცა საქართველოს და ქართველ ხალხს ახსენებენ. მორალს რომ თავი დავანებოთ, გაიხსენონ, ვენის კონვენცია, მათი განცხადებები და გამოსვლები აღარაფერში აღარ წერია. რა მნიშვნელობა აქვს, რა პროფესიის არის ადამიანი და რა თანამდებობას იკავებს? როცა ადამიანი მკვლელობას სჩადის, უნდა დაისაჯოს თუ არა? – რა თქმა უნდა, კი. ინდულგენცია ვერ იქნება, ამ ადამიანს პოლიტიკოსს უწოდებენ თუ არა. როგორი პოლიტიკოსები არიან, ეს ცალკე საკითხავია. ჩვეულებრივი აგენტურის წარმომადგენლები არიან. კონსტიტუციით ვალდებულებაა, რომ საგამოძიებო კომისიის მოთხოვნას დაემორჩილო. ფაქტია, სხდომაზე არ მივიდნენ. მეორე ფაქტია, რომ კანონით, ეს დასჯადია. აქ სად არის პოლიტიკა? – გვარამიას, მელიას საქმეები გვახსოვს, რის თაობაზეც ელჩები და საერთაშორისო პირები პოლიტიკურ მართლმსაჯულებაზე საუბრობდნენ, მაგრამ შემდეგ საკუთარი სიტყვების უკან წაღება მოუწიათ, რადგან სტრასბურგის სასამართლომ თქვა, რომ ქართული სასამართლოს მიერ სწორი გადაწყვეტილება იყო მიღებული. თუ ხაზარაძე-ჯაფარიძე სტრასბურგის სასამართლოში წასვლას გაბედავენ, კიდევ ერთხელ დამარცხდებიან“, – განაცხადა გორდულაძემ.
ცნობისთვის, სასამართლოს გადაწყვეტილების საფუძველზე „სტრატეგია აღმაშენებლის“ ლიდერი გიორგი ვაშაძე დღეს, ხოლო „ლელოს“ ლიდერები მამუკა ხაზარაძე და ბადრი ჯაფარიძე გუშინ დააკავეს. ოპოზიციის სამივე ლიდერს პარლამენტის დროებითი საგამოძიებო კომისიის მოთხოვნის შეუსრულებლობის ფაქტზე თბილისის საქალაქო სასამართლომ პატიმრობა შეუფარდა. მათ ასევე აეკრძალათ თანამდებობის დაკავება ორი წლით.