„იმედის“ მფლობელმა ირაკლი რუხაძემ ტელეკომპანია Al Jazeera-ს ვრცელი ინტერვიუ მისცა (ვიდეო)

ტელეკომპანია „იმედი“, მისი მასშტაბი, საქმიანობა, მისია, ისტორია, 2007 წლის 7 ნოემბრის დარბევა, არსებული მედიაგარემო, ქვეყანაში მიმდინარე პოლიტიკური პროცესები – ეს ის თემებია, რომლებზეც ტელეკომპანია „იმედის“ მფლობელმა ირაკლი რუხაძემ ტელეკომპანია Al Jazeera-ს ინგლისურენოვანი ბიუროსთვის მიცემულ ვრცელ ინტერვიუში ისაუბრა.

თუმცა, Al Jazeera-მ სიუჟეტში ინტერვიუს მხოლოდ მცირე ნაწილი გამოიყენა. ტელეკომპანია „იმედი“ გთავაზობთ ირაკლი რუხაძის ინტერვიუს სრულ ვერსიას.

ინტერვიუში ირაკლი რუხაძემ „იმედზე“ საუბრისას აღნიშნა, რომ ეს ტელეკომპანია ყველაზე და დანარჩენზე გაცილებით დიდი ტელეკომპანიაა საქართველოში.

„ჩვენ ოცწლიანი ისტორია გვაქვს. დაახლოებით 21, 22 წლის წინ შევუდექით საქმეს. დღევანდელ დღეს კი, მცირედი ცვლილებით, მაგრამ საშუალოდ 3 – ჯერ და 4 – ჯერ უფრო დიდი ვართ, ვიდრე ჩვენი უახლოესი და ყველა ტელეკომპანია, რომელიც აშუქებს პოლიტიკურ მოვლენათა განვითარებას და ამზადებს ახალ ამბებს. ამავე დროს, თუკი ჩვენ შევაჯამებთ, საქართველოში მოქმედ იმ ტელეკომპანიებს, რომლებიც პოლიტიკას აშუქებენ, ვგულისხმობ ნიუსს, სრულფასოვან სატელევიზიო არხებს, ამ თვალსაზრისით, ხშირ შემთხვევაში ჩვენ მაყურებელთა რიცხვი სხვა ტელეკომპანიების საერთო რეიტინგს აღემატება. ამ გადმოსახედიდან, „იმედი“ უძლეველია ქართულ სატელევიზიო სივრცეში.

ასევე, მნიშვნელოვნად მიმაჩნია იცოდეთ, რომ 2007 წელს, ყოფილმა ხელისუფლებამ ტელეკომპანია იმედის მაუწყებლობა გათიშა, არხი დაარბიეს. სწორედ ეს შენობა დაარბიეს, ჩვენი ტექნიკა დალეწეს და მომდევნო 4 წელიწადი არხი ხელისუფლების კონტროლის ქვეშ იყო“, – განაცხადა ირაკლი რუხაძემ.

ჟურნალისტის ერთ-ერთი კითხვა ტელეკომპანიის სიუჟეტებში გამოყენებულ ტერმინებს [„უცხო გავლენა“ და DEEP STATE] და ამ ტერმინებთან დაკავშირებით კრიტიკოსების მოსაზრებებს ეხებოდა, რომელთა შეფასებით ეს რუსული ნარატივის ასლია. ირაკლი რუხაძემ განმარტა, რომ ეს არ არის ტელეკომპანიის მიერ გამოგონილი ტერმინოლოგია.

„დარწმუნებული ვარ, რომ საქართველოში ბევრი იმავე სიტყვებს იყენებს. ტელეკომპანია „იმედი“ კი ინტერვიუს ჩაწერისას იყენებს ამ სიტყვებს, ან სვამს კითხვებს ამ საკითხთან დაკავშირებით, მაგრამ ეს არ გახლავთ იმედის გამოგონილი ტერმინოლოგია. თქვენ ამბობთ, რომ ეს რუსული თამაშის წესების ნაწილია. იმედი მაქვს უსმენთ დონალდ ტრამპს, გნებავთ ილონ მასკს, ან ჯეი დი ვენსს, ზოგადად ხალხს მათ გარშემო. ისინი იმავე ტერმინოლოგიის უმეტეს ნაწილს იყენებენ, მოგწონთ თუ არა თქვენ ეს“, – აღნიშნა „იმედის“ მფლობელმა.

საპროტესტო გამოსვლებთან დაკავშირებულ კითხვაზე პასუხად კი ირაკლი რუხაძემ განაცხადა:

„ქართული ოცნება“ ქართველი ხალხის მიერ არის არჩეული. 2012 წლიდან მათ ბოლო 10 არჩევნებში გაიმარჯვეს. მათ წინააღმდეგ ერთი ფუნდამენტური ჯგუფია, ყოფილი სახელისუფლებო პარტია და მისი სხვადასხვა რეინკარნაცია. „ქართულმა ოცნებამ“ კი ყველა არჩევნები მოიგო, საპარლამენტო, საპრეზიდენტო, გნებავთ ადგილობრივი არჩევნები“.

ინტერვიუში საუბარი სხვა თემებთან ერთად შეეხო „ფარას“ კანონს, ასევე მზია ამაღლობელის საქმეს. ჟურნალისტის კითხვას, რომ ამაღლობელია „ჟურნალისტია და აცხადებენ, რომ ის სინდისის პატიმარია“, ირაკლი რუხაძემ უპასუხა:

„მზია ამაღლობელი რომ დალაქი ყოფილიყო და იგივე ჩაედინა იტყოდით, რომ საქართველოს ხელისუფლება დალაქების წინააღმდეგ ილაშქრებს? კი ბატონო, ის ჟურნალისტია, მაგრამ მან დღისით, მზისით, ყველას დასანახად სამართალდამცველს სილა გააწნა, საპოლიციო დანაყოფის მეთაურს. არ აქვს მნიშვნელობა ჟურნალისტი ხარ, ფეხბურთელი თუ დალაქი – ეს არ შეიძლება. თუკი ამას სჩადიხარ, მაშინ პასუხს აგებ მართლმსაჯულების წინაშე. მე ვურჩევ ქალბატონ ამაღლობელს, რომ სტრასბურგის ადამიანის უფლებათა სასამართლოში იჩივლოს. თუკი მას მიაჩნია, რომ ის პატიმრობაში ჟურნალისტის პროფესიის მიზეზით იმყოფება. მისი პატიმრობის მიზეზით სასამართლო მის საქმეს დაჩქარებული წესით განიხილავს. ძალიან ბევრი ფული იხარჯება მისი ადვოკატებისთვის და კეთილი ინებოს და იჩივლის სტრასბურგში. თუმცა, იგი არ მიდის“.

ირაკლი რუხაძემ ასევე ისაუბრა იმის შესახებ, თუ როგორ შუქდება საქართველოში მიმდინარე მოვლენების უცხოეთში და აღნიშნა, რომ ეს გაშუქება ცალმხრივია.

„ეს შესანიშნავი ქვეყანაა, საკმაოდ ბევრი საქმეა გაკეთებული, მრავალი მიმართულებით“, – განაცხადა ირაკლი რუხაძემ.