საქართველოს პრეზიდენტი მიხეილ ყაველაშვილი, სპორტის მინისტრ შალვა გოგოლაძესთან ერთად, წრიული რბოლების ეროვნული ჩემპიონატის გახსნის ცერემონიას დაესწრო, – ინფორმაციას პრეზიდენტის ადმინისტრაცია ავრცელებს.
„მიხეილ ყაველაშვილმა საქართველოს საავტომობილო სპორტის ფედერაციას ღონისძიების ორგანიზებისთვის მადლობა გადაუხადა.
„ჩვენი ქვეყანა დიდ მნიშვნელობას ვანიჭებთ სპორტს და სპორტულ ღონისძიებებს. დღე არ გავა, რომ ჩვენმა სპორტსმენებმა არ გაგვახარონ და დიდ წარმატებას არ მიაღწიონ. 2012 წლიდან დაწყებულია სპორტისა და სპორტული ფედერაციების მიზანმიმართული განვითარება.
საქართველო პრეზიდენტმა სპორტული ინფრასტრუქტურის განვითარების მნიშვნელობის შესახებაც ისაუბრა.
„ყველა რეგიონში იქნება მულტიფუნქციური ცენტრები, სადაც ყველა ადამიანს ექნება შესაძლებლობა დაკავდეს ჯანსაღი ცხოვრების წესით. ეს არის ჩვენი პრიორიტეტი და ამას შედეგიც აქვს. ეს არის საწყისი ეტაპი. მერწმუნეთ, წინ კიდევ უფრო დიდი გამარჯვებები გველოდება“,- განაცხადა პრეზიდენტმა.
ღონისძიება რუსთავის საერთაშორისო ავტოდრომზე გაიმართა. ცერემონიაზე სახელმწიფო ჰიმნი საქართველოს თავდაცვის სამინისტროს ეროვნული გვარდიის ორკესტრმა შეასრულა, რასაც ვერტმფრენების საჩვენებელი გადაფრენა მოჰყვა. ჩემპიონატის ორგანიზატორებმა რბოლის დაწყებამდე რუსთავის ავტოდრომზე მისულ სტუმრებს შოუ-პროგრამით უმასპინძლეს. კერძოდ, გაიმართა ისტორიული ავტომობილების გამოფენა“, – აღნიშნულია გავრცელებულ ინფორმაციაში.