თურქეთის საგარეო საქმეთა სამინისტრო განცხადებას ავრცელებს, სადაც აღნიშნულია, რომ ოფიციალური ანკარა მხარს უჭერს პროგრესს, რომელსაც აზერბაიჯანმა და სომხეთმა მყარი მშვიდობის დამყარების გზაზე მიაღწიეს.
კერძოდ, როგორც განცხადებაშია აღნიშნული, თურქეთი საგარეო საქმეთა სამინისტრო მიესალმება იმას, რომ აზერბაიჯანის პრეზიდენტმა, ილჰამ ალიევმა და სომხეთის პრემიერ-მინისტრმა, ნიკოლ ფაშინიანმა 8 აგვისტოს აშშ-ის პრეზიდენტის, დონალდ ტრამპის შუამავლობით ხელი მოაწერეს სამშვიდობო დეკლარაციას.
„იმ დროს, როცა საერთაშორისო კონფლიქტები, კრიზისები მწვავდება, ეს ნაბიჯი რეგიონში მშვიდობისა და სტაბილურობის მიღწევის თვალსაზრისით ძალიან მნიშვნელოვანია. ჩვენ დიდად ვაფასებთ აშშ-ის ადმინისტრაციის წვლილს ამ პროცესში“, – აღნიშნულია განცხადებაში.
თურქეთის საგარეო უწყება აგრეთვე ხაზს უსვამს იმას, რომ ახლა სამხრეთ კავკასიაში მშვიდობისა და კეთილდღეობის მიღწევის ისტორიული შესაძლებლობა გაჩნდა.
ცნობისთვის, გუშინ ვაშინგტონში, თეთრ სახლში ტრამპმა, აზერბაიჯანის პრეზიდენტმა, ილჰამ ალიევმა და სომხეთის პრემიერ-მინისტრმა, ნიკოლ ფაშინიანმა ხელი მოაწერეს სამშვიდობო დეკლარაციას.