ევროპამ და უკრაინამ აშშ-ს წარუდგინეს სამშვიდობო გეგმა „წითელი ხაზებით“, – ამის შესახებ „უოლ სთრით ჯორნალი“ წერს.
გამოცემის ინფორმაციით, ცეცხლის შეწყვეტის შესახებ ევროპისა და უკრაინის მიერ წარდგენიული გეგმა აშშ-ის პრეზიდენტ დონალდ ტრამპსა და რუსეთის პრეზიდენტ ვლადიმერ პუტინს შორის დაგეგმილი მოლაპარაკებებისთვის საფუძველი უნდა გახდეს.
„ევროპის მიზანია, უკრაინასთან ერთად იმუშაოს საერთო წითელი ხაზის გავლებაზე, რომელიც, ევროპელი ოფიციალური პირების აზრით, უნდა გავრცელდეს რუსეთთან ნებისმიერ შესაძლო მოლაპარაკებებზე“, – წერს „უოლ სთრით ჯორნალი“.
გამოცემის ცნობით, ევროპის წინადადება ითვალისწინებს ცეცხლის შეწყვეტას ნებისმიერი შემდგომი ნაბიჯის გადადგმამდე. მასში ასევე ნათქვამია, რომ ტერიტორიების გაცვლა შესაძლებელია მხოლოდ ორმხრივ საფუძველზე, ანუ უკრაინა თუ გაიყვანს ჯარებს ზოგიერთი რეგიონიდან, რუსეთმა უნდა გაიყვანოს ჯარები სხვა რეგიონებიდან.
ამასთან, ამერიკელებისთვის გადაცემული ევროპული გეგმა ასევე ითვალისწინებს, რომ უკრაინის მიერ ნებისმიერი ტერიტორიული დათმობა უნდა იყოს გამყარებული მტკიცე უსაფრთხოების გარანტიებით, მათ შორის ნატო-ს შესაძლო წევრობით.
გამოცემა ანონიმურ წყაროზე დაყრდნობით წერს, რომ როგორც კი პუტინის ნამდვილი გეგმა აშკარა გახდა, ის მაშინვე უარყვეს როგორც ზელენსკიმ, ასევე ევროპელებმა.
„ეს უბრალოდ პუტინისთვის ყველაფრის მიცემაა, რაც მას სურს არაფრის სანაცვლოდ“, – აღნიშნა წყარომ.
შეგახსენებთ, აშშ-ის პრეზიდენტ დონალდ ტრამპისა და რუსეთის პრეზიდენტ ვლადიმერ პუტინის შეხვედრა ალასკაზე 15 აგვისტოს გაიმართება.