ევროკომისიის ანგარიში ბევრი მიმართულებით საქართველოს, როგორც წამყვან ქვეყანას გამოყოფს. ობიექტური განსჯისა და განხილვის პირობებში ევროკომისია ძალიან სამართლიან და სწორ ანგარიშს წარუდგენს საზოგადოებას, – ამის შესახებ საპარლამენტო უმრავლესობის წევრმა, დავით მათიკაშვილმა განაცხადა.
მათიკაშვილის თქმით, ცინიკურია, რომ ერთი მხრივ, სამართლიანად არის საუბარი იმის შესახებ, საქართველოს მთავრობამ რა წარმატებებს მიაღწია, მეორე მხრივ კი, ხდება უსამართლო ზეწოლა ქართველ ხალხზე.
დავით მათიკაშვილი ამბობს, რომ ევროკავშირი უნდა ჩამოყალიბდეს, რა სურს საქართველოსგან.
„რამდენად ცინიკურია მოცემულობა, როდესაც ევროკომისიის ანგარიში, რომელიც კარგი მთავრობის ამ კონკრეტულ სეგმენტს ეხება, ძალიან ბევრი მიმართულებით საქართველოს, როგორც წამყვან ქვეყანას გამოყოფს და ხაზს უსვამს. ამ ანგარიშში საქართველო უსწრებს ევროკავშირის წევრ ქვეყნებსაც, უსწრებს ევროკავშირის კანდიდატ ყველა ქვეყანას და ევროკომისია საქართველოსთან მიმართებით განსაკუთრებულ პროგრესს ასახელებს სწორედ „ქართული ოცნების“ ხელისუფლების პირობებში.
რამდენად ცინიკურია, როდესაც ობიექტური განსჯისა და განხილვის პირობებში ევროკომისია ძალიან სამართლიან და სწორ ანგარიშს წარუდგენს საზოგადოებას. ასეთი ანგარიშები მანამდეც ვნახეთ კანდიდატის სტატუსის მიღების პირობებში, როდესაც საქართველოს კანდიდატის სტატუსზე უარი უთხრეს და ამ დროს, ევროკომისიამ დადებითი დასკვნით საქართველო შეაქო მაშინდელ ანგარიშებში. მეორე მხრივ, ჩვენ ქართველ ხალხს და საქართველოს პირდაპირ გვემუქრებიან, რომ ქართველი ხალხი თუ არ შეასრულებს კონკრეტული ევრობიუროკრატების სურვილებს საქართველოში და ქვეყნის ხელისუფლებაში არ მოიყვანს მარიონეტებს, ქართველი ხალხი დაკარგავს იმ ბენეფიტს და სიკეთეს, რომელიც საქართველომ ევროკავშირთან ურთიერთობაში ძალიან სამართლიანად მოიპოვა. საქართველოს არცერთი პუნქტი და განაწესი არ დაურღვევია იმ სახელშეკრულებო წესიდან, რომელიც ქვეყანას ავალდებულებს, უვიზო მიმოსვლასთან დაკავშირებით დაიცვას სათანადო წესები საზღვრის დაცვასთან დაკავშირებით. ამ პირობებში, როცა ერთი ხელით სამართლიანად გვეუბნებიან, მთავრობამ რა წარმატებებს მიაღწია, მეორე მხრივ კი, ხდება უსამართლო ზეწოლა ქართველ ხალხზე, საბოლოო ჯამში, ევროკავშირში უნდა ჩამოყალიბდნენ, რა სურთ საქართველოსგან და ჩვენი ქვეყანა რად მიაჩნიათ. ჩვენი ქვეყანა სუვერენულ, დამოუკიდებელ და დემოკრატიულ სახელმწიფოდ თუ მიაჩნიათ, პირველ რიგში, მოუსმინონ და მხარი დაუჭირონ ხალხის გადაწყვეტილებას, რომელიც ქართველმა ხალხმა უკვე მიიღო“, – განაცხადა დავით მათიკაშვილმა.