მიმდინარე კვირაში პოლონეთის საჰაერო სივრცეში შეიჭრა იაფფასიანი რუსული დრონები – ისინი ჩამოაგდეს მრავალმილიონიანი დოლარის ღირებულების სისტემებით, რამაც ნათლად აჩვენა, რომ ნატო სათანადოდ არ არის მომზადებული მსგავსი საფრთხეებისთვის, – წერს ამერიკული გამოცემა POLITICO.
პოლონეთში ოთხშაბათს, სულ მცირე, 19 დრონი შეფრინდა, რაც „რუსეთის მხრიდან პოლიტიკური და სამხედრო გამოცდა იყო. ძალიან კარგია, რომ პოლონეთმა დრონები აღმოაჩინა და ჩამოაგდო“, – განაცხადა ევროპის საგარეო ურთიერთობათა საბჭოს უფროსმა მკვლევარმა, ულრიკე ფრანკემ.
მაგრამ ნატოს ქმედება ბევრად ნაკლებად ეფექტური იყო, ვიდრე უკრაინის რეაგირება მსგავს სიტუაციაში. ალიანსმა დაახლოებით სამი დრონი ჩამოაგდო, მაშინ როცა კიევი ჩვეულებრივ აცხადებს, რომ ჩამოგდების მაჩვენებელი 80-დან 90 პროცენტამდე აქვს, მიუხედავად იმისა, რომ ბევრად უფრო დიდ თავდასხმებს უმკლავდება.
ულრიკე ფრანკემ დასძინა, რომ რუსეთის იაფფასიან აღჭურვილობასა და ნატოს ძვირადღირებულ სამხედრო რეაგირებას შორის შეუსაბამობაა: „რას ვაპირებთ, ყოველ ჯერზე F-16-ებს და F-35-ებს გავგზავნით? ეს არამდგრადია. ჩვენ უნდა მოვემზადოთ უკეთ და შევიძინოთ დრონების საწინააღმდეგო სისტემები“.
ოთხშაბათს, დიდი ბრიტანეთის თავდაცვის მდივანმა, ჯონ ჰილიმ განაცხადა, რომ სამხედრო მაღალჩინოსნებს მიმართავს, თუ როგორ შეუძლია ლონდონს დახმარების გაწევა ნატოს საჰაერო თავდაცვის გასაძლიერებლად. უკრაინამაც ასევე შესთავაზა თავისი დახმარება.