დიდი ბრიტანეთი, საფრანგეთი და გერმანია დოჰაზე ისრაელის დარტყმას გმობენ. ამის შესახებ ნათქვამია სამი ქვეყნის საგარეო საქმეთა მინისტრების ერთობლივ განცხადებაში, რომელსაც გაერთიანებული სამეფოს საგარეო უწყება ავრცელებს.
გერმანიის, საფრანგეთისა და გაერთიანებული სამეფოს საგარეო საქმეთა მინისტრები აცხადებენ, რომ დოჰაზე ისრაელის დარტყმა არღვევს კატარის სუვერენიტეტსა და რეგიონში ვითარების ესკალაციის რისკს ქმნის.
ამასთან, მათი განცხადებით, ამგვარი ქმედებები სერიოზულ საფრთხეს უქმნის შეთანხმების მიღწევას მძევლების გასათავისუფლებლად და ღაზაში ომის დასასრულებლად. მინისტრები ყველა მხარეს მოუწოდებენ, განაახლონ ძალისხმევა და შეთანხმდნენ ცეცხლის დაუყოვნებლივ შეწყვეტაზე.
გერმანიის, საფრანგეთისა და ბრიტანეთის წარმომადგენლები სოლიდარობას უცხადებენ კატარს და გამოხატავენ მხარდაჭერას მისი მნიშვნელოვანი როლის მიმართ, რომელსაც ის ასრულებს ისრაელსა და „ჰამასს“ შორის შუამავლობის ძალისხმევაში, ეგვიპტესა და აშშ-თან ერთად.
„ჩვენ ასევე ხაზს ვუსვამთ, რომ ყურადღება უნდა შენარჩუნდეს ცეცხლის მუდმივი შეწყვეტის მიღწევაზე, ყველა დარჩენილი მძევლის გათავისუფლებასა და ღაზის სექტორში დახმარების მიწოდებაზე შიმშილის შესაჩერებლად. ჩვენ სასწრაფოდ მოვითხოვთ ქალაქ ღაზაში ისრაელის სამხედრო ოპერაციების დაუყოვნებლივ შეჩერებას, რაც იწვევს მშვიდობიანი მოსახლეობის მასობრივ გადაადგილებას, მსხვერპლს მშვიდობიან მოსახლეობაში და აუცილებელი ინფრასტრუქტურის განადგურებას. ჩვენ მოვუწოდებთ გაერო-ს და ჰუმანიტარულ არასამთავრობო ორგანიზაციებს, შეძლონ უსაფრთხოდ და მასშტაბურად მუშაობა მთელ ღაზის სექტორში, მათ შორის ჩრდილოეთში. ჩვენ კიდევ ერთხელ მტკიცედ ვგმობთ ტერორისტული მოძრაობა „ჰამასის“ მიერ ჩადენილ საზარელ დანაშაულებს, მან დაუყოვნებლივ და უპირობოდ უნდა გაათავისუფლოს მის მიერ დაკავებული მძევლები, განიარაღდეს და სამუდამოდ გამოირიცხოს ღაზის სექტორის მმართველობიდან“, – ნათქვამია სამი ქვეყნის საგარეო საქმეთა მინისტრების განცხადებაში.
ცნობისთვის, ისრაელმა დოჰაში „ჰამასის“ ხელმძღვანელობაზე თავდასხმა 9 სექტემბერს განახორციელა.