უკრაინის დაზვერვამ აიღო პასუხისმგებლობა თავდასხმაზე, რომელმაც ხუთი ადამიანი იმსხვერპლა.
2022 წლის ოქტომბერში, ყირიმის ხიდზე სატვირთო მანქანის აფეთქებისთვის, რვა პირს სამუდამო პატიმრობა მიესაჯა. პასუხისმგებლობა მომხდარზე, რომელმაც ხუთი ადამიანი იმსხვერპლა, უკრაინის დაზვერვამ აიღო. კიევის განცხადებით, ყირიმის ხიდი უკრაინაში შეჭრილი რუსული ჯარების მომარაგებისთვის საჭირო ინფრასტუქტურის ნაწილს წარმოადგენდა. რუსული ბრალდების თანახმად, ასაფეთქებელი ნივთიერებები რუსეთში ავტომობილით ბულგარეთის, სომხეთისა და საქართველოს გავლით შეიტანეს.
დახურულ კარს მიღმა გამართული სამხედრო ტრიბუნალის წინაშე რვა პირი ტერორიზმის ბრალდებით წარდგა. პროკურატურის განცხადებით, ისინი ორგანიზებული დანაშაულებრივი ჯგუფის წევრები იყვნენ, რომლებიც უკრაინას ყირიმის ხიდზე აფეთქების მოწყობაში დაეხმარნენ. წაყენებული ბრალდება ყველა მსჯავრდებულმა უარყო და განაცხადა, რომ უკრაინის განზრახვის შესახებ არაფერი იცოდნენ. ასაფეთქებელი ნივთიერებების გადამტანთა თქმით, არ იცოდნენ, რა ტვირთი გადაჰქონდათ. პროკურატურამ ბრალდებულთა ეს ვერსია უარყო. მსჯავრდებულთა შორის იყო ლოგისტიკური კომპანიის ხელმძღვანელი, რომელმაც რუსეთის სამხრეთიდან ყირიმში ტვირთის გადატანის კონტრაქტი გააფორმა.
ოლეგ ანტიპოვი – ბრალდებული: „რვავემ გავიარეთ სიცრუის დეტექტორი და ჩვენი უდანაშაულობა დავამტკიცეთ. პოლიციაში ჩვენ თვითონ მივედით. გამოძიებასთანაც სრულად ვითანამშრომლეთ. ჩვენ წინააღმდეგ ჩვენება არავის მიუცია. ყველა მოწმემ თქვა, რომ უდანაშაულოები ვართ. ყველა მტკიცებულება ჩვენს უდანაშაულობაზე მეტყველებს“.
2023 წელს უკრაინის უსაფრთხოების სამსახურის ხელმძღვანელმა, ვასილ მალიუკმა განაცხადა, რომ ასაფეთქებელი ნივთიერებები პლასტიკური ფირის დიდ რულონებში მოთავსებულ ლითონის ცილინდრებში იყო დამალული. მისი თქმით, ზოგიერთი მონაწილე არ იყო ინფორმირებული იმის შესახებ, თუ რა ხდებოდა.
ერთ-ერთი ბრალდებულის ადვოკატმა აღნიშნა, რომ განაჩენს გაასაჩივრებს. მან დაიჩივლა, რომ არ მიეცა შესაძლებლობა, კლიენტის უდანაშაულობა დაემტკიცებინა.
ალექსეი დუბროვინი – ადვოკატი: „ჩემს კლიენტს ბრალად ედება დანაშაულისთვის ხელშეწყობა, SIM ბარათის გადაცემის გზით. თუმცა, წინასწარმა გამოძიებამ ექვსჯერ თქვა უარი დამატებითი კომპიუტერული ექსპერტიზის ჩატარებაზე. ორჯერ სასამართლომ გვითხრა უარი. სამჯერ გვითხრეს უარი ექსპერტის დაკითხვაზე. არ მოგვეცა შანსი, ჩვენი უდანაშაულობა დაგვემტკიცებინა“.
ყირიმის ხიდზე აფეთქებამ დანაღმული სატვირთო მანქანის მძღოლი და ოთხი სხვა ადამიანი იმსხვერპლა, რომლებიც ახლომდებარე მანქანაში ისხდნენ. ჩაინგრა 19-კილომეტრიანი საავტომობილო ხიდის ნაწილი, რომელიც 2018 წელს პრეზიდენტმა პუტინმა პირადად გახსნა.