უკრაინის გენერალურმა შტაბმა, „ტელეგრამ-არხის“ საშუალებით, გაავრცელა ინფორმაცია, რომ ქვეყნის სამხედრო ძალებმა სტავროპოლის (რუსეთი) მხარეში ქიმიურ ქარხანაზე მიიტანეს იერიში, რასაც მასშტაბური ხანძარი მოჰყვა.
იმავე წყაროს ცნობით, ქარხანა ასაფეთქებელი ნივთიერებების კომპონენტებს აწარმოებს და ამ ტიპის საწარმოებს შორის ერთ-ერთი უდიდესია რუსეთის ფედერაციაში.
ამ ინფორმაციას რუსული მხარე არ გამოხმაურებია, საინფორმაციო სააგენტო „როიტერმა“ კი აღნიშნა, რომ ინფორმაციის დამოუკიდებლად გადამოწმება ვერ შეძლო.
ყირიმში რუსული ავიაგამანადგურებელი ჩამოაგდეს
თავის მხრივ, უკრაინის სამხედრო დაზვერვის სამსახური იუწყება, რომ გუშინ ღამით, დრონებით თავდასხმის შედეგად, ყირიმის ნახევარკუნძულზე რუსული მრავალფუნქციური ავიაგამანადგურებელი MiG-29 და სარადარო სადგური განადგურდა.
„ავიაგამანადგურებელი კასას სამხედრო აეროდრომზე იდგა“, – აღნიშნა იმავე წყარომ და გაავრცელა ვიდეო, რომელშიც ჩანს, როგორ ეჯახება MiG-29-ს უპილოტო საფრენი აპარატი.
ამ ტიპის გამანადგურებლები საბჭოთა პერიოდში შეიქმნა და დიდი რაოდენობით იწარმოებოდა. ადრე ისინი უკრაინის საჰაერო ძალების მთავარ დამრტყმელ ძალას წარმოადგენდნენ, რუსეთთან ომის მიმდინარეობისას კი კიევი დასავლური წარმოების გამანადგურებლებზე გადავიდა.
„უკრაინის დაზვერვის სამსახურის მიერ გავრცელებული ინფორმაციის დამოუკიდებლად გადამოწმება შეუძლებელია“, – აღნიშნავს გერმანული საინფორმაციო სააგენტო DPA.
Ουκρανία: Χτύπημα σε μεγάλη ρωσική μονάδα παραγωγής εκρηκτικών υλών