ესტონურმა კომპანია „ნიტროტოლმა“ ემარის თავდაცვის ინდუსტრიულ პარკში სამხედრო ასაფეთქებელი ნივთიერებების წარმოება დაიწყო.
ესტონეთის თავდაცვის ინვესტიციების ცენტრის (RKIK) მიერ დაარსებულ ემარის თავდაცვის ინდუსტრიულ პარკში სამხედრო ასაფეთქებელი ნივთიერებების წარმოების დაწყება, თავდაპირველად, მიმდინარე წლის გაზაფხულზე იგეგმებოდა.
„ნიტროტოლმა“ პროდუქციის ტესტირება 10 წლის წინ დაიწყო. 2019 წლიდან, კომპანია აწარმოებს სამხედრო ასაფეთქებელ საშუალებებს, მათ შორის – ნაღმებს. თუმცა, ადრე ესტონეთის კანონმდებლობა არ იძლეოდა საშუალებას, რომ კომპანიის პროდუქცია ასაფეთქებელი ნივთიერებებით ადგილზე შევსებულიყო – ეს საზღვარგარეთ უნდა გაკეთებულიყო.
„ნიტროტოლის“ პროდუქციას ესტონეთის თავდაცვის ძალებიც იყენებენ. კომპანია წარმოების გაფართოებას მომავალში ტისტამაას თავდაცვის ინდუსტრიულ პარკში გეგმავს.
„ჩვენ კვლავ გვიწევს ნედლეულის შეძენა და პროდუქციის საზღვარგარეთ გაგზავნა. თუმცა, ისე აღარ არის, რომ ნახევარფაბრიკატებით ევროპაში უნდა ვიაროთ და შემდეგ პროდუქცია ჩვენს მომხმარებლებს სხვა ქარხნებიდან გავუგზავნოთ. ტისტამაას ინდუსტრიული პარკის ტერიტორიაზე ადგილისთვის ვიბრძოლეთ და ჩვენ ის მივიღეთ. ვგეგმავთ, რომ იქ სამხედრო ასაფეთქებელი ნივთიერებების წარმოება ბევრად უფრო დიდი მასშტაბით გავაგრძელოთ, ვიდრე ეს ამჟამინდელ ქარხანაში, ემარიშია შესაძლებელი“, – განაცხადა „ნიტროტოლის“ მმართველთა საბჭოს წევრმა, იენს ჰაუგმა.
„ჩვენ მკაცრად ვიცავთ სამ პრინციპს. ეს არის უსაფრთხოება, კანონმდებლობა და ტექნიკური მხარდაჭერა. მშვიდობიან დროს, ამ სამ სფეროში დათმობებზე წასვლა დაუშვებელია. შედეგად, ემარიში წარმოება დაახლოებით ექვსი თვის დაგვიანებით დავიწყეთ“, – დასძინა ესტონეთის თავდაცვის ინვესტიციების ცენტრის ინფრასტრუქტურის დეპარტამენტის დასავლეთის პორტფელის მენეჯერმა, სტივენ ლინკოვმა.